«Baýyrjan shıyrshyǵy» búginge deıin AQSh pen Izraıldiń áskerı oqý oryndarynda oqytylady

ASTANA. KAZINFORM — Baýyrjan Momyshuly Uly Otan soǵysy maıdanyna týra Máskeý úshin shaıqastyń qyzǵan kezinde keldi. Ol Almatyda qurylǵan general Ivan Vasılevıch Panfılov basqarǵan 316-shy atqyshtar dıvızııasyna tústi.

Mádenıet jáne aqparat mınıstrligi málimetinshe, Baýyrjan Momyshuly sol kezde ofıtserlik shenge ıe bolǵan, sondyqtan birden batalon komandıri qyzmetine taǵaıyndaldy. Al 316-shy dıvızııany tikeleı Máskeýdi qorǵaýǵa jiberdi.

Vermahttyń qatty shabýyly kezinde jaýdy toqtatyp, áskerdiń jeke quramyn saqtap qalý úshin erekshe taktıkalyq amaldar kerek boldy. Sodan beri «Baýyrjan shıyrshyǵy» dep atalatyn taktıka el esinde qaldy.

Onyń máni mynadaı edi: jaýdyń shabýyldaýshy kolonnasyna kenetten soqqy berip, uzaq soǵysqa barmaı, sheginip otyrǵan. Osylaısha jaýdyń kúshi birtindep álsiregen. Sol kezde qaıta soqqy berip, sol soqqy jeńiske jetkizgen.

Jas qazaqtyń taktıkasymen betpe-bet kelgen general Gepner Gıtlerge joldaǵan baıandamasynda bylaı dep jazǵan: «Eshqandaı soǵys zańdary men erejelerin moıyndamaıtyn, jabaıy dıvızııa. Onyń sarbazdary berilmeıdi, erekshe fanatızmmen soǵysady jáne ólimnen qaımyqpaıdy».

Baýyrjan Momyshuly birneshe ret qorshaýda qalǵan, biraq ár joly áskerin de, oǵan senip tapsyrylǵan bólimderdiń jaýyngerlik qabiletin de saqtap, sátti shyǵa bildi.

«Baýyrjan shıyrshyǵy» búginge deıin AQSh pen Izraıldiń áskerı oqý oryndarynda qorshaýdan shyǵý kezindegi jaýyngerlik is-qımyl úlgisi retinde oqytylady.

Baýyrjan Momyshulyna «Keńes Odaǵynyń Batyry» ataǵy tek 1990 jyly, qaıtys bolǵannan keıin berildi. Ol 1982 jyly dúnıeden ótti.

Aıta keteıik, Baýyrjan Momyshulynyń alyp portreti Rekordtar kitabyna endi.