Baýyrjan Omarbekov: Saılaýaldy úgit-nasıhatta ashyqtyq pen teńdik kúsheıtiledi
ASTANA. KAZINFORM – Májilistiń jalpy otyrysynda saılaý júıesine qatysty birqatar mańyzdy jańashyldyq talqylandy. Bul týraly Jibek Joly telearnasynyń mobıldi stýdııasyna bergen suhbatynda QR Ulttyq ekonomıka vıtse-mınıstri Baýyrjan Omarbekov aıtty.
Baýyrjan Omarbekovtyń aıtýynsha, saılaýaldy úgit-nasıhat naýqany barysynda onlaın platformalardyń qyzmetine qatysty jańa talaptar engizilip jatyr.
- Buǵan deıin buqaralyq aqparat quraldarynyń jumysy tolyq reglamenttelip, naqty tártippen rettelgen bolatyn. Alaıda qazirgi ýaqytta onlaın platformalardyń aýdıtorııasy men yqpaly keıbir BAQ-tan kem túspeıdi. Sondyqtan olardyń qoǵamdaǵy rólin eskere otyryp, onlaın platformalarǵa da naqty talaptar qoıý usynylyp otyr. Endi onlaın platformalar kandıdattardyń barlyǵyna teń múmkindik berýge mindetti bolady. Máselen, eger platforma bir kandıdatpen kelisimshart jasap, úgit-nasıhat júrgizýge alań usynsa, sol okrýgten saılaýǵa túsip jatqan ózge kandıdattarǵa da dál sondaı múmkindik berýi qajet. Eger platforma qarsy kandıdatqa da usynys jasap, biraq ol odan bas tartsa, onda jaýapkershilik onlaın platformaǵa júktelmeıdi. Al mundaı múmkindik múlde berilmese, tıisti jaýapkershilik qarastyrylady, - dedi ol.
Sonymen qatar ol saılaý qoryndaǵy qarajatty paıdalaný tártibin buzǵandarǵa jaýapkershilik kúsheıtiletinin atap ótti.
- Úgit-nasıhat jumystaryna memleket tarapynan belgili bir kólemde qarjy bólinedi. Aýyl ákimderiniń saılaýyna qatysty qazirgi redaktsııada kandıdattarǵa jeke qor qurýǵa múmkindik qarastyrylmaǵan. Olar tek memleket bólgen qarajat aıasynda úgit-nasıhat jumystaryn júrgizýge mindetti. Qarajatty maqsatsyz paıdalaný dep kelisimshartta kórsetilgen qyzmetten tys nemese talapqa sáıkes kelmeıtin shyǵyndardy aıtýǵa bolady. Mundaı jaǵdaıda ákimshilik jaýapkershilik qarastyrylady. Al saılaý qory bar kandıdattarǵa qordan tys qarjy tartýǵa tyıym salynady, - dedi Baýyrjan Omarbekov.
Al aýyl jáne aýdan ákimderin saılaý kezinde daýys sany teń túsken jaǵdaıda qaıta daýys beriledi.
- Bul — qaıta saılaý emes, qaıta daýys berý rásimi. Mundaı jaǵdaıda eki kandıdat qalady da, bir aı ishinde qaıta daýys berý ótkiziledi. Sol ýaqyt aralyǵynda kandıdattarǵa úgit-nasıhat jumystaryn jalǵastyrýǵa múmkindik beriledi, - dedi QR Ulttyq ekonomıka vıtse-mınıstri.
Onyń aıtýynsha, usynylyp otyrǵan ózgerister tájirıbede kezdesken naqty máselelerdi eskere otyryp ázirlengen.
- Mysaly, bir azamattyń bir mezette oblystyq máslıhatqa da, Parlamentke de kandıdat bolyp tirkelýge áreket jasaǵan jaǵdaılar bolǵan. Osyǵan baılanysty bir azamattyń birneshe saılaýǵa qatar qatysýyna shekteý qoıý usynylady, - dedi ol.
Vıtse-mınıstrdiń sózinshe, negizgi ózgeristerdiń basty qaǵıdaty — ashyqtyqty qamtamasyz etý.
- Basty ózgeristerdiń negizgi qaǵıdatynyń biri — ashyqtyq. Bul, eń aldymen, BAQ pen onlaın platformalardaǵy úgit-nasıhat jumystarynyń ashyq júrgizilýine qatysty. Sonymen qatar saılaý qorlary men úgit-nasıhatqa bólingen qarajattyń qalaı ıgerilip jatqany da ashyq bolýy tıis, - dedi QR Ulttyq ekonomıka vıtse-mınıstri Baýyrjan Omarbekov.
