Baýyrjan Momyshulynyń 115 jyldyǵyna arnalǵan kitap tanystyryldy
ASTANA. KAZINFORM - Otan qorǵaýshylar kúni men Uly Otan soǵysyndaǵy Jeńistiń 80 jyldyǵy qarsańynda aty ańyzǵa aınalǵan qolbasshy, ult batyry, jazýshy Baýyrjan Momyshulynyń 115 jyldyǵyna arnalǵan aıryqsha kitap jaryq kórdi, dep habarlaıdy Kazinform agenttigi.
Joba KAZ Minerals Tobynyń qoldaýymen júzege asyryldy.
Kitap qazaq jáne orys tilinde jazylǵan. Munda Baýyrjan Momyshulynyń ómirindegi búginge deıin beımálim bolyp kelgen jaıttar - Kólbastaýdaǵy balalyq shaq, qan maıdandaǵy erlik joly, soǵystan keıingi qoǵamdyq-ádebı qyzmeti sóz bolady. Kórkem bezendirilgen basylymda muraǵattaǵy qujattar, tarıhı qundy sýretter men Momyshulynyń tól týyndylarynan úzindiler jáne zamandastarynyń estelikteri keltirilgen.
Kitapty daıyndaý jumysy ult batyry jaıly estelikti hatqa túsirip jas urpaqqa dáripteý maqsatyn ustanǵan «Central Asia Production» baspa úıiniń redaktorlary men dızaınerlerin, tarıhshylar men zertteýshilerdi jáne metsenattardy biriktirdi.
Basylymnyń jaryq kórýi KAZ Minerals Tobynyń tarıhı tanym men patrıottyqty damytýǵa baǵyttalǵan mádenı-aǵartý bastamalarynyń mańyzdy bólshegine aınaldy.
– Baýyrjan Momyshuly týraly estelik – tarıhymyzdyń bir bólshegi ǵana emes, jastarǵa ónege bolatyn qundy derekkóz bolyp sanalady. Bul uly tulǵanyń ómirbaıany ǵana emes, urpaqtar arasyndaǵy rýhanı baılanys, namys, erlik pen Otanǵa qyzmet etýdiń mańyzdylyǵy týraly týyndy, - dep málimdedi «KAZ Minerals Management» JShS basqarma tóraǵasy Eldar Mamedov.
Jarqyn sýretteme, sırek kezdesetin materıaldar men tarıhı tereń mazmuny bul kitapty ulttyq tanymdy nyǵaıtý turǵysynda mańyzdy ete túspek.
Osyǵan deıin Baýyrjan Momyshulynyń alyp portreti Rekordtar kitabyna engeni týraly jazdyq.