Baýyrjan Momyshulyna «Halyq qaharmany» ataǵy berildi
TARAZ. KAZINFORM — Qasym-Jomart Toqaev Baýyrjan Momyshulyna «Halyq qaharmany» ataǵyn berý týraly sheshim qabyldaǵanyn málimdedi. Bul týraly Aqordanyń baspasóz qyzmeti habarlady.
— Keshe Baýyrjan Momyshulynyń týǵanyna 115 jyl toldy. Dańqty qolbasshynyń naǵyz erlik joly elimizben qatar, shetelderde óte tanymal.
Halqymyz ony qaharman tulǵa retinde qurmet tutady. Biraq áıgili batyrǵa resmı túrde «Halyq qaharmany» ataǵy berilmegen. Oblys jurtshylyǵy, zııaly qaýym ókilderi, tipti, jastarymyz da osy máseleni kóterip júrgenin bilemiz. Tarıhı ádildikti qalpyna keltirýimiz kerek, — dedi ol.
Prezıdent batyrdyń esimi naǵyz otanshyldyq pen óshpes erliktiń sımvoly retinde árdaıym kópke úlgi-ónege bolýǵa tıis ekenin aıtty.
— Sondyqtan men Memleket basshysy retinde Baýyrjan Momyshulyna «Halyq qaharmany» ataǵyn berý týraly sheshim qabyldadym. Tıisti Jarlyqqa búgin qol qoıdym, bul qujat mindetti túrde jarııalanady.
Batyrdyń esimi naǵyz otanshyldyq pen óshpes erliktiń sımvoly retinde árdaıym kópke úlgi-ónege bolýǵa tıis.
Baýkeńniń erligi jaı ańyz emes, bul — naqty qujattarmen dáleldengen, Uly Otan soǵysyna qatysqan batyrlar moıyndaǵan sózsiz erlik. Elge erligimen tanylǵan, eńbegi sińgen azamattaryn baǵalaı bilgen jurt eshqashan utylmaıdy, — dedi Qasym-Jomart Toqaev.
Sonymen qatar Prezıdent Tarazda jańadan ashylǵan áskerı mektep-ınternatqa Baýyrjan Momyshulynyń esimin berýdi usyndy
— Men búgin Tarazda jańadan ashylǵan áskerı mektep-ınternatqa bardym. Bul — ońtústik aımaqtarda ashylǵan osyndaı alǵashqy oqý orny. Men mektep-ınternatqa osy ólkeniń týmasy, áıgili batyrymyz Baýyrjan Momyshulynyń esimin berýdi usynamyn.
Osyndaı Baýyrjan mektepteri barlyq aımaqta ashylýy kerek. Úkimet bul máseleni pysyqtaıdy. Biz jas urpaqqa sapaly bilim berip, olardy otanshyldyqqa tárbıeleýimiz qajet, — dedi Prezıdent.
Aıta ketelik Baýyrjan Momyshulynyń soǵys jyldaryndaǵy júrek jutqan erligi men qolbasshylyq qaǵıdattary kúni búginge deıin Qazaqstannyń áskerı mektebiniń mańyzdy bóligi. Batyr babamyzdyń týǵanyna 115 jyl tolýyna oraı Kazinform tilshisi onyń baı murasyna taǵy bir márte úńilip kórgen edi.