Baýyrjan Islamhan «Astana» sapyna qosyldy

ASTANA. KAZINFORM - Qazaqstandyq fýtbolshy Baýyrjan Islamhan «Astana» klýbymen osy jyldyń sońyna deıin kelisimshartqa qol qoıdy.

Bul jóninde komandanyń baspasóz qyzmeti málim etti.

Baýyrjan Islamhan 2013 jyly elordalyq klýbtyń namysyn qorǵap, jarty maýsymda 8 oıyn ótkizgen.

Baýyrjan Islamhan 1993 jyly dúnıege kelgen. Fýtboldaǵy alǵashqy qadamyn 2011 jyly «Taraz» komandasynda bastaǵan ol qazaqstandyq «Astana», «Qaırat», «Ordabasy», «Turan», Reseıdiń «Kýban», Birikken Arab Ámirliginiń «Al-Aın» klýbynyń namysyn qorǵady. 

Qazaqstan ulttyq quramasy sapynda 2012 jyldan beri 56 kezdesýde 4 gol soqty. 

Atalǵan transferge baılanysty «Astana» klýbynyń basshysy Saıan Hamıtjanov túsinikteme berdi.

«Qazir Baýyrjan óz babynan áli alysta ekenin jaqsy túsinip otyrmyz. Jaraqatynan keıin ol burynǵy qalpyna kelýi úshin ýaqyt qajet. Mundaı jaǵdaıdan eshkim saqtandyrylmaǵan.

Sondyqtan Islamhannyń ulttyq qurama men otandyq fýtboldaǵy eńbegin eskere otyryp, klýb onyń tolyq qalpyna kelýine kómektesý durys dep sheshti. Biz oǵan ýaqyt kerek ekenin túsinemiz.

Qazir ol bizdiń maqsatymyzdy oryndaýǵa tikeleı kómektese almaıdy. Soǵan qaramastan, onyń joǵary deńgeıdegi fýtbolshy ekenine esh kúmánimiz joq. «Astana» oǵan qaıta qalpyna kelýge, burynǵy babyna enip, qazaqstandyq jankúıerlerdi oıynymen qaıta qýantýǵa múmkindik berýge daıyn», – dedi ol.