Baýyrjan Baıbektiń Perızat Qaırat isine qandaı qatysy bar

ASTANA. KAZINFORM — Elordada soty ótip jatqan eriktiler qozǵalysynyń belsendisi jáne qoǵamdyq qaıyrymdylyq qor quryltaıshysy Perızat Qaırat sóz arasynda burynǵy «Nur Otan» (qazirgi Amanat) partııasy tóraǵasynyń birinshi orynbasary bolǵan, Almaty qalasynyń eks-ákimi Baýyrjan Baıbektiń esimin atap ótti.

— Suraq-jaýap bólimin qordyń quryltaıshylarynan bastasa deımin, sebebi aıyptaý aktisiniń birinshi abzatsynda meni anammen birge qor qurdy, jalǵan qol jınady dep aıyptap otyr. Al bul qor partııa janynan, Baýyrjan Baıbek myrzanyń basshylyǵy kezinde qurylǵan. Barlyq quryltaıshy - meni qospaǵanda, keıbiri burynǵy, al keıbiri áli kúnge partııada jumys istep júrgen qyzmetkerler, — dedi Perızat Qaırat sot otyrysynda.

Sýdıa sot otyrysy boıynsha úzilis jarııalady.

Buǵan deıin memlekettik aıyptaýshy Perızat Qaırat pen onyń anasyna taǵylǵan aıyptardy tizbektep shyqty.

Sýdıa suraǵyna jaýap bergen Perızat Qaırat aıyptar negizsiz taǵyldy dep, moıyndamaıtynyn jetkizdi.

Aıta ketsek, buǵan deıin de Perızat Qaırat ózine taǵylǵan aıyptarmen kelispedi. 

Sondaı-aq Perızat Qaırat tergeý ızolıatory qyzmetkerlerinen jábir kórgenin aıtqan edi. Artynsha elorda polıtsııasy tergeý ızolıatorynda bolǵan jaıttyń vıdeosyn kórsetti. 

Belgili bolǵandaı Perızat Qaırattyń soty ishinara jabyq ótedi. 

Buǵan deıin elordada Perızat Qaırattyń isine qatysty aldyn ala sot otyrysy ótti. 

Bıyl 30 maýsymda Perızat Qaırattyń isi sotqa jiberildi. 

Eske salaıyq, eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany 2024 jyly 14 qarashada belgili boldy.