Baýyrjan Aıtqazın Shyǵys Qazaqstan oblysy ákiminiń baspasóz hatshysy boldy

Shyǵys Qazaqstan oblysy ákiminiń baspasóz hatshysy bolyp Baýyrjan Aıtqazın taǵaıyndaldy, dep habarlaıdy Kazinform agenttigi. 

Baýyrjan Aıtqazın Almaty memlekettik ýnıversıtetiniń fılologııa fakýltetin, Máskeý memlekettik ekonomıka, statıstıka jáne ınformatıka ınstıtýtyn «Antıkrızıstik basqarý» mamandyǵy boıynsha támamdaǵan.

Buqaralyq aqparat quraldary salasyndaǵy tájirıbesi mol. «Tań» telearnasynda jańalyqtar júrgizgen, 31 arnada «Informbıýro» baǵdarlamasynyń jetekshi shyǵarýshy redaktory bolyp qyzmet atqardy.

Sondaı-aq «Habar» agenttiginiń «7 kún» aqparattyq-analıtıkalyq baǵdarlamasyn júrgizdi.

Ár jyldary respýblıkalyq «Qazaqstan» teleradıokorporatsııasynyń Shyǵys Qazaqstan jáne Pavlodar oblystaryndaǵy fılıaldaryn basqardy.

Qazaqstan Respýblıkasy Prezıdenti Teleradıokesheniniń bas dırektory, Májilis Parlamenti baspasóz qyzmetiniń basshysy, Mádenıet jáne aqparat mınıstrligi aqparat jáne muraǵat komıtetiniń tóraǵasy, «Qazaqstan» respýblıkalyq teleradıokorporatsııasy basqarma tóraǵasynyń orynbasary bolyp qyzmet atqardy.

Qazaqstan Jýrnalıster Odaǵy premııasynyń laýreaty, «Aqparat salasynyń úzdigi» tósbelgisimen marapattalǵan.