«Baýyryna salý» fılminiń rejısseri: «Oskarda» jeńiske úmitkerlerdiń qataryndamyz
ASTANA. KAZINFORM – Qazaqstandyq rejısser Ashat Kýchınchırekovtyń «Baýyryna salý» fılmi Oskarǵa qalaı usynylǵanyn jáne týyndy nelikten álemdik úzdik kartınalar tizimine enýi tıis ekenin aıtyp berdi.
Rejısser fılmde qazaqtyń ejelden kele jatqan dástúri, ıaǵnı balany týystaryna, ata-ájesine tárbıeleýge berý máselesi qozǵalatynyn túsindirdi. Bul taqyryp qazaq mádenıetinde aıtylsa da, keńinen talqylanǵan emes.
Ashat Kýchınchırekov óziniń bir jas úsh aılyǵynda ájesiniń tárbıesine berilgenin, osy dástúrmen óskenin, sondyqtan da bul taqyryp ony únemi tolǵandyryp júrgenin moıyndady.
«Álemde kóptegen bala ata-ájesi nemese basqa da týystarynyń qolynda ósip jatyr jáne bul fılm olardyń ómirdegi jaǵdaıyn sýretteıdi. Ásirese, osy jaǵdaı Qazaqstanda óte mańyzdy, óıtkeni kópshiligimiz ata-ájeniń qolynda óstik. Biz bul týraly oılaǵan kezde óte jyly sezimge bólenemiz, sondyqtan kartına bul jaǵynan óte áserli shyqty», - dedi rejısser.
Onyń aıtýynsha, fılmde onyń balalyq shaǵy men týǵan aýylyndaǵy ómiri beınelengen. Túsirilim úsh jylǵa sozyldy jáne San-Sebastıan kınofestıvalinde fılmniń premerasy ótti.
Onda fılm besinshi oryn alyp, eń joǵary «A» álemdik reıtıngin aldy.
Qazir fılm 17 kınofestıvalden ótip, júldeli oryndarǵa ıe boldy. Al rejısserdiń ózi eń úzdik rejısser jáne stsenarıst retinde tanyldy. Endi komandanyń aldynda Oskar syılyǵynda álemdik úzdik 15 fılmniń qataryna kirý mindeti tur.
«Bizdi nazardan tys qaldyra almaıdy, sebebi 17 júldeni alyp úlgerdik. Biz kózge túsemiz degen oıdamyn. Atap aıtqanda, favorıtterdiń qatarynda turmyz», - deıdi rejısser.
Sonymen qatar ol qazirdiń ózinde sheteldik seriktester túsirilim tobynyń jumysyna nazar aýdaryp otyrǵanyn, al halyqaralyq BAQ fılmge joǵary baǵa bergenin atap ótti. Osy oraıda rejısser jumysyn jalǵastyryp, bul baǵytta ózin shyńdaı túsýge daıyn ekenin jetkizdi.
Eske salsaq, «Baýyryna salý» fılmi Mádenıet jáne aqparat mınıstrligi men ulttyq kınony qoldaý ortalyǵynyń qoldaýymen túsirilgen. Fılm jaqynda «Tulpar» ulttyq syılyǵyn ıelendi jáne Oskar komıtetine International Feature Film nomınatsııasy boıynsha Qazaqstan atynan usynylyp otyr.
Amerıka akademııasynyń daýys berýi úsh kezeńde ótedi. 9-13 jeltoqsan aralyǵynda akademıkter shortlıst jasaqtaıdy, ol 17 jeltoqsanda jarııalanady. Daýys berý 2025 jyldyń 8-12 qańtary aralyǵynda ótedi. Onyń qorytyndysy boıynsha 17 qańtarda barlyq sanattaǵy nomınanttar belgili bolady. Úshinshi, sońǵy kezeń 11-18 aqpan aralyǵynda ótedi. Jeńimpazdardyń esimi 2025 jyldyń 2 naýryzynda Los-Anjeleste konvertterdi ashý saltanatynda jarııalanady.
