Batystyń Reseıge sanktsııasy Qazaqstanǵa tikeleı áser etpeýi múmkin - A. Myrzahmetov

ASTANA. QazAqparat - Batystyń Reseıge qarsy jasaǵan sanktsııasy Qazaqstanǵa tikeleı áser etpeýi múmkin. Búgin Ortalyq kommýnıkatsııalar qyzmetinde ótken brıfıngte QR Ulttyq kásipkerler palatasynyń basqarma tóraǵasy Abylaı Myrzahmetov osylaı málimdedi.

«Sanktsııa naqty Reseıge baǵyttalǵan. Sondyqtan da, batystyń bul sanktsııasy Qazaqstanǵa tikeleı áser etpeýi múmkin dep oılaımyz. Degenmen, Reseı - bizdiń basty saýda áriptesterimizdiń biri. Sondyqtan da, ekonomıkadaǵy ózgerister bolmaı turmaıdy dep sanaımyz», - deıdi Abylaı Myrzahmetov.

Sonymen qatar, palatanyń basqarma tóraǵasy sanktsııaǵa qaramastan reseılik sarapshylar óz elinde tómen bolsa da ekonomıka ósimin kútetinin atap ótti. Sonymen bir mezgilde, batystyń sarapshylary qysqa merzim ishinde Reseı ekonomıkasynyń (-5) paıyzǵa deıin quldyraıtynyn boljaǵan.

«Álbette, ázirshe birdeńe aıtý qıyn ári erterek. Degenmen, batys sanktsııasynyń Reseı ekonomıkasyn tejemeı qoımaıtyny aıqyn. Al qazir bundaı jaǵdaı Qazaqstan ekonomıkasyna esh áser etken joq», - dep atap ótti A. Myrzahmetov.