Batystyń balany kesh kóterý úlgisi bizge de kelip jetti
ASTANA 13 jeltoqsan. QazAqparat - Qazirgi áıelder birinshi kezekte qyzmet satysymen kóterilýdi oılap, bala tabýdy «30-dan keıingi» kezeńge ysyrady. Alaıda, olar áıeldiń jasy 40-qa jaqyndaǵan saıyn tabıǵı túrde bala kóterý kórsetkishi nebary 1 % ǵana bolatynyn bile me eken? Sonymen qatar túsik tastaý qaýpi 50%-dan astamdy quraıdy. Bul týraly búgin Astanada ótken bedeýlikti emdeý máselelerine arnalǵan dóńgelek ústel májilisinde Baltıka-Amerıka klınıkasynyń ekstrakorporaldy uryqtandyrý zerthanasynyń meńgerýshisi Jıvıle Gýdlevıchene málim etti, dep habarlaıdy astana. kz.
Onyń aıtýynsha, tipti, deni saý, belsendi jas áıelderdiń ózinde bala kóterý múmkindigi salystyrmaly túrde alǵanda óte úlken emes - 20-25% ǵana. Óıtkeni, 30 jasqa deıingi áıelderdiń aǵzalarynda barlyǵy 50%-ǵa tarta analyq jasýshalar genetıkalyq zaqymdanbaǵan ıdealdy bolyp tabylady. Sondyqtan jas kezdiń ózinde deni saý áıeldiń túsik tastaý qaýpi 10-15%-ǵa deıin bolýy múmkin.
Baltıka-Amerıka klınıkasynyń Áıelder densaýlyǵy ortalyǵynyń meńgerýshisi Rımantas Grıtsıýsdyń pikirinshe, áıelder bala kóterýdi uzaq merzimge keıinge qaldyra bermeýi kerek. Nege deseńiz, jas ósken saıyn tabıǵı jolmen bolatyn júktilikti aıtpaǵanda, jasandy jolmen uryqtandyrý kómegimen de bala kóterý múmkindigi tym tómendeı beredi. Ol bylaı deıdi: «Bul endi - áleýmettik tendentsııa. Bizge kóbine 40 jas shamasyndaǵy áıelder keledi. Jastary ósip ketkendikten, olarmen jumys isteý qıyn». Mundaı keleńsizdikterdiń eń basty sebebin ol osy máseledegi halyqtyń málimetiniń azdyǵymen baılanystyrdy.
Jyldar boıy bala kóterem dep úmittenip júrip, áıelder ózderiniń bedeýlikterine tipti, de kúdiktenbeıdi. Dáriger mamandarǵa júgingen kezde aıtarlyqtaı ýaqyt ótip ketedi de kóp qıyndyq týǵyzady. Sondaı-aq, Rımantas Grıtsıýs eger áıel kóńili shyn qalap, bir jyl boıy bala kótere almasa, mindetti túrde tekserilip, emdelýi qajet degendi qadap aıtty.
