Batystaǵy aýyzsý tapshylyǵyn Kókjıdeniń kómegimen retteýge bolady – vıtse-mınıstr
QR Ekologııa, geologııa jáne tabıǵı resýrstar vıtse-mınıstri Serikqalı Brekeshev Kókjıde ken ornyndaǵy qazba jáne barlaý jumystarynyń jerasty sý qoryna tıgizetin zardaby týraly pikir bildirdi.
«Jerasty sýlarynyń lastanýyn boldyrmaý úshin memlekettik organdar men jergilikti ákimdik Kókjıde ken ornynyń aýdanyndaǵy jerasty sýlaryna monıtorıng júrgizip keledi. Munaı óndirýshilerdiń áreketinen jerasty sýynyń lastaný faktileri arakidik anyqtalǵan bolatyn. Bıyl osyǵan baılanysty vedomstvoaralyq jumys toby qurylǵan. Komıssııa uıymdastyrylyp, synamalar alyndy. Biraq kontsentratsııalardyń shekten shyǵýy dáleldengen joq. Biraq biz sonda da tıisti nusqaýlar berdik», - dedi vedomstvo ókili.
Sondaı-aq, ol atalmysh aýmaqtaǵy jerasty sýynyń naqty qory áli naqtylanbaǵanyn aıtty. Ol úshin bıyl jergilikti ákimdik tapsyrysymen barlaý jumystary júrgizilip jatqan kórinedi.
«Kókjıde ken orny eldiń batysyndaǵy eń iri sý qory bolyp esepteledi. Onyń áleýetin turǵyndardyń sapaly aýyz sýǵa tapshylyǵyn joıýǵa paıdalanýǵa bolady. Qazir Aqtóbe oblysy ákimdiginiń tapsyrysy boıynsha «Aqpan» JShS Kókjıde ken ornynyń qazirgi jaǵdaıyn zertteý maqsatynda jerasty sýlarynyń paıdalanylatyn qorlaryn jete barlaý jáne qaıta baǵalaý boıynsha jumystar júrgizip jatyr. 2021 jyldyń aıaǵyna qaraı jerasty sýlarynyń qorlary qaıta baǵalanady. Ken ornynyń ózekti kontýrlary aıqyndalady jáne naqty ekologııalyq júktemesi baǵalanady», - dedi Serikqalı Brekeshev.
Onyń aıtýynsha, qazirgi tańda atalmysh aýmaqta kómirsýtek óndiretin 8 kásiporyn barlaý jáne óndirý jumystaryn júrgizip jatyr.
«Jumys qorytyndylary boıynsha ken ornynyń jerasty sýlarynyń yqtımal lastanýyna jol bermeý jónindegi sharalar kesheni ázirlenetin bolady», - dedi vıtse mınıstr.