Batysqazaqstandyqtarǵa memlekettik nagradalar tabys etildi
Saltanatty sharada oblys ákimi Altaı Kólginovtiń atap ótkenindeı, táýelsiz elimizdiń odan ári órkendep, alǵa basýyna óz eńbegin sińirip, qomaqty úlesin qosyp kele jatqan adamdar qaı salada da az emes. Eńbek eshqashan eskerýsiz qalmaıdy. Táýelsizdiktiń 25 jyldyǵyna oraı Elbasy Jarlyǵymen marapattalyp otyrǵandardyń qaı-qaısysy da qurmetke laıyq.
«Elbasymyzdyń tapsyrmasyna sáıkes memlekettik nagradalardy tabys etip otyrmyz. Marapattalǵandar arasynda áleýmettik sala qyzmetkerleri, kásipkerler, sharýa adamdary bar. Táýelsiz elimizdiń qaryshtap damýy úshin olardyń aldaǵy ýaqytta qajyrly eńbek eteri anyq. Eń bastysy, Elbasymyz únemi aıtatynyndaı, ortaq maqsat jolynda birige bileıik. Eldigimiz ben birligimiz myqty bolsyn», - dedi ákim.
Jıynǵa qatysqan QR Aqparat jáne kommýnıkatsııalar mınıstri Dáýren Abaev batysqazaqstandyqtardy Táýelsizdiktiń torqaly toıymen quttyqtap, elimiz osy jyldar ishinde tolaǵaı tabystarǵa qol jetkizgenin atap ótti. «Aq Jaıyq óńirinde azattyq úshin janyn qıǵan Isataı men Mahambetteı batyrlar barshylyq. Qazaqtyń aqıyq aqyny Juban Moldaǵalıevtiń aıtqanyndaı, «myń ólip, myń tirilgen» halqymyzdyń táýelsizdikke qoly jetti. Babalarymyzdyń ańsaǵan armany oryndaldy. Óz aldyna bólek el bolǵan Qazaqstan Elbasymyzdyń bastaýymen qaryshtap damyp, búkil álem tanyǵan memleketke aınaldy. Osynyń bári - Elbasy saıasatynyń naqty nátıjesi, el birliginiń jemisi», - dedi mınıstr.
Budan keıin óńir basshysy men Aqparat jáne kommýnıkatsııalar mınıstri memlekettik nagradalardy tapsyrdy. «Parasat» ordenimen Terekti aýdanyndaǵy «Aqas» sharýa qojalyǵynyń jetekshisi, oblystyq máslıhat depýtaty Qataýolla Ashyǵalıev, Zelenov aýdanynan «Matevosıan» ShQ basshysy Aleksandr Matevosıan, eńbek ardageri Tólegen Merǵalıev marapattaldy. «Qurmet» ordenin belgili aıtysker aqyn Sholpan Qydyrnııazova, Ǵ.Qurmanǵalıev atyndaǵy oblystyq fılarmonııanyń Dáýletkereı atyndaǵy qazaq halyq aspaptar orkestriniń bas dırıjery ári kórkemdik jetekshisi Erkin Nurymbetov, «QPO b.v.» kompanııasy bas dırektorynyń orynbasary Marat Kárimov, Zelenov aýdanynan «Kırgenev» ShQ basshysy Qaıyrjan Kırgenov jáne basqalar ıelendi. Taǵy bir topqa úshinshi dárejeli Eńbek dańqy ordeni, «Eren eńbegi úshin» medali jáne Qazaqstan Respýblıkasynyń Qurmet gramotasy tabys etildi.
