Batysqazaqstandyqtar jasóspirim qyzdy sýdan qutqardy
ORAL. QazAqparat - 5 sáýir kúni 20 saǵat 52 mınýtta qutqarý qyzmetiniń «112» nómirine Bórli aýdany Aleksandrov aýylyndaǵy orta mekteptiń 9-synyp oqýshysynan qıyn jaǵdaıda qalǵany jóninde habar túsken, dep habarlaıdy «QazAqparat» tilshisi.
BQO TJ departamentiniń bas mamany Azamat Nurpeıisovtiń aıtýynsha, jasóspirim qyz qurbysymen aýyldan 200 metr jerdegi toǵan janynda oınap júrip, qas qaraıa qaýipti jerde qalyp qoıǵan. Sýdan óteıin dese, muz shytynap jaryla bastaǵan. Bórlilik qutqarýshylar oqıǵa ornyna jetkenshe, jedel kezekshi kómekshisi, azamattyq qorǵaý serjanty A.Qapashev qyzǵa telefon arqyly psıhologııalyq kómek kórsetip, sýda ne isteý kerektigin aıtqan. 21 saǵat 40 mınýtta mekteptiń sharýashylyq bóliminiń meńgerýshisi A.Lebed pen ýchaskelik polıtsııa ınspektory N.Sársenǵalıev toǵannyń qaýipsiz bóligimen aınalyp ótip, qyzdy jaǵaǵa alyp shyqty.
BQO TJ departamenti qazirgi kezde ózenderde muzdyń berik emestigin, oıylyp ketý qaýpi zor ekendigin turǵyndarǵa eskertýde.
Eske sala keteıik, 24 naýryz kúni Qaztalov aýdany Bostandyq aýylynda eki er adam «Nıva» avtokóligimen mal izdep júrip, abaısyzda sýǵa ketip qalǵan bolatyn.
