Batysqazaqstandyqtar jappaı aǵash egýge qatysty
ORAL. QazAqparat - Búgin Oral qalasynyń jurtshylyǵy qalalyq mádenıet jáne demalys saıabaǵyndaǵy Shaǵan ózeniniń oń jaǵalaýynda «Gúldene ber, týǵan el!» atty ekologııalyq sharaǵa qatysyp, aǵash otyrǵyzdy, dep habarlaıdy «QazAqparat» tilshisi.
«Búkilqazaqstandyq aǵash egý kúni» respýblıkalyq sharasy aıasynda oblystyq senbilik uıymdastyrylyp, oǵan eńbek ardagerleri, óńirdegi mekeme-uıymdar basshylary men qyzmetkerleri jáne jastar atsalysyp, óz úlesterin qosty.
Sharaǵa qatysqan oblys ákimi Altaı Kólginovtiń atap ótkenindeı, Oraldyń kórikti de jasyl qalaǵa aınalýy úshin mundaı isterdi jumyla atqarýdyń mańyzy zor. Elbasynyń «Bolashaqqa baǵdar: rýhanı jańǵyrý» maqalasynda aıtylǵanyndaı, «Týǵan el» baǵdarlamasyna ár turǵyn belsene qatysyp, ózi turatyn aýmaqtyń odan ári damyp, gúldenýine úles qossa, týǵan jer, ósken ólkege degen qurmet pen sezim de arta túsedi. Sonyń ishinde tal-terek egip, ony kútip baptaýǵa erekshe nazar aýdarý kerek.
Osyndaı shara shahardyń basqa shaǵynaýdandary men oblystyń barlyq aýdandarynda ótti.
Aıta keteıik, búgin oblys kóleminde 42 myńnan astam túp aǵash otyrǵyzý josparlanǵan bolatyn. Oblystyq sanıtarlyq-ekologııalyq aılyǵy 12 mamyrǵa deıin jalǵasady. 
