Batysqazaqstandyqtar Jańa jyl merekesin shat-shadyman kóńil-kúıde qarsy aldy

Ádemi bezendirilgen shyrshalar Oral qalasynyń kórnekti oryndarynda, sondaı-aq kenttik okrýgterde ornatylyp, jańajyldyq baǵdarlamalar qoıyldy. Abaı, Chapaev alańdary, «Oral» saýda oıyn-saýyq ortalyǵy, Derkól jáne Zachagan kentterinde bir mezgilde saǵat túngi 23-te mereke otshashýǵa ulasty.

Ortalyq Abaı alańynda qala turǵyndary men qonaqtaryn oblys ákimi Baqtyqoja Іzmuhambetov quttyqtap, ótken 2010 jyldyń Batys Qazaqstan oblysy úshin de berekeli bolǵandyǵyn atap ótti. Aıtalyq, oblys boıynsha 272 mlrd. teńgege 49 ınvestıtsııalyq joba júzege asyrylýda. 90 mlrd. teńge turatyn 9 iri joba respýblıkalyq ındýstrııalandyrý kartasyna enip, barlyǵy da jyl aıaǵyna deıin paıdalanýǵa berildi. Mundaı jobalar jańa jylda da jalǵasyn tabady.

«Qarashyǵanaq - Oral» gaz qubyrynyń ekinshi kezeńi iske qosyldy. Nátıjesinde Terekti, Syrym jáne Qaratóbe aýdandary turǵyndarynyń kógildir otynǵa qoly jetti. 2011 jyly Jaıyqtyń sol jaq betinde turatyn Terekti jáne Aqjaıyq aýdandarynyń halqy da osyndaı úlken qýanyshqa kenelmek.

2010 jyly áleýmettik jáne mádenı salada qol jetkizgen jetistikter barshylyq. Jańadan 5 bilim berý nysany salyndy. Taǵy bir tabys - sońǵy úsh jylda mektep jasyna deıingi balalardy bala baqshamen qamtý 41 paıyzdan 84 paıyzǵa jetkizildi.

Oblysta densaýlyq saqtaý salasy da jaqsy damyp keledi. Ótken jyly Aqjaıyq, Terekti jáne Zelenov aýdandarynda jáne Oral qalasynda jańa aýrýhanalar men emhanalar paıdalanýǵa berildi.

Jańa jyl qarsańynda Óskemen qalasynda Elbasymyz Nursultan Ábishuly Nazarbaevtyń prezıdenttik ókilettigin uzartý jónindegi referendýmnyń bastamashyl tobyn qurýǵa arnalǵan jınalysqa qatysýshylar barlyq Qazaqstan Respýblıkasy azamattaryna Úndeý jarııalady. Bul bastamany batysqazaqstandyqtar da qyzý qoldap, el damýynyń basty ıdeıalyq dem berýshisi - Tuńǵysh Prezıdentimiz - Elbasy saıasatyn qoldaıtyndyqtaryn bildirýde.

2011 jyl búkil qazaqstandyqtar úshin erekshe jyl bolmaq. Óıtkeni, bul jyly elimiz Islam konferentsııasy uıymyna tóraǵalyq etedi. Dúnıejúzinde bedeli joǵary bul uıymǵa tóraǵalyq etý TMD elderi arasynda birinshi ret Qazaqstanǵa senip tapsyryldy. Bul, sóz joq, Elbasymyz Nursultan Ábishuly Nazarbaevtyń ishki jáne syrtqy arenadaǵy salıqaly saıasatynyń jemisi.

Qoıan jylynda VII qysqy Azııa oıyndary Astana men Almatyda ótkizilmek. Dodaly básekege Batys Qazaqstan oblysynan 39 sportshy qatysady.

Tarıhı da taǵylymdy mereke - Táýelsizdiktiń 20 jyldyǵyn urpaqqa ónege, halyqqa maqtanysh, álemge aıbar bolar sharalarmen atap ótý de 2011 jyldyń enshisinde.

Oral qalalyq mádenıet jáne tilderdi damytý bóliminiń bastyǵy Saıran Dúısenteginiń aıtýynsha, buryn jańajyldyq bezendirý boıynsha baıqaý mekeme-kásiporyndar arasynda ótkizilip kelse, bıyl saýda oryndary jarysqa tústi. Oral qalasynyń ákimi Samıǵolla Orazovtyń atynan múgedek jáne az qamtylǵan otbasylar balalary jańajyldyq shyrshalar uıymdastyrylyp, tartý-taralǵylar tabys etildi.

Óńirde jańajyldyq mereke balalar úshin odan ári jalǵasýda. 2 qańtarda «Oral» saýda oıyn-saýyq ortalyǵy aldyndaǵy shyrsha janynda, 3 qańtarda qalalyq mádenıet jáne demalys saıabaǵynda jańajyldyq erteńgilikter bolmaq.