Batysqazaqstandyqtar zańsyz saqtap kelgen qarýlary úshin 2,2 mln. teńge aldy
ORAL. QazAqparat - Batys Qazaqstan oblysynda bıyl 127 dana atys qarýy tapsyryldy, dep habarlaıdy «QazAqparat» tilshisi.
BQO ishki ister departamentiniń baspasóz qyzmetinen túsken málimetke qaraǵanda, respýblıka boıynsha atalmysh shara bastalǵan 10 sáýirden beri oblysta 115 aryz túsip, 127 qarý tapsyrylsa, sonyń 13-i - uzyn uńǵyly, úsheýi - qysqa uńǵyly, 109-y tegis uńǵyly oıyq qarý. Ekeýi - travmatıkalyq qarý. Oǵan qosa eki artıllerııalyq snarıad, 109 dana oq-dári tapsyrylǵan.
Osy ýaqyt ishinde Oral qalasynyń turǵyndary 44, Bórli aýdanyndaǵylar 16, jańaqalalyqtar 16 dana qarýdy óz erikterimen ótkizgen.
Jalpy, atalmysh sharany ótkizý úshin respýblıkalyq bıýdjetten BQO-ǵa 8 mln. 034 myń teńge bólingen bolatyn. Kúni búgin tapsyrylǵan qarý men oq-dárilerdiń quny 6 mln. 575,562 myń teńgeni qurap otyr. Sonyń ishinde 43 materıal boıynsha 2 mln. 287,152 myń teńge aqshalaı syıaqy berilgen.
