Batysqazaqstandyqtar robot tehnıkasy olımpıadasynda tabysty óner kórsetti
ORAL. QazAqparat - Oraldaǵy Nazarbaev zııatkerlik mektebiniń shákirtteri negizin quraǵan batysqazaqstandyqtar Astanadaǵy «EKSPO-2017» halyqaralyq kórmesiniń kongress-zalynda ótken respýblıkalyq robot tehnıkasy olımpıadasynda tabysty óner kórsetti, dep habarlaıdy «QazAqparat» tilshisi.
Atalmysh mekteptiń baspasóz hatshysy Aqmonshaq Maqsotqyzynyń aıtýynsha, «Negizgi», «Shyǵarmashylyq» jáne «Robottar fýtboly» sanattary boıynsha ótken saıysta elimiz óńirlerinen kelgen 300-den astam oqýshy baq synady.
«Shyǵarmashylyq» sanaty boıynsha Oraldaǵy Nazarbaev zııatkerlik mektebiniń oqýshylary Shynbolat Tinálıev pen Asan Bekqalıev joǵary toptar, al Mádına Orazova men Dana Nursultanova orta toptaǵylar arasynda birinshi orynǵa ıe boldy. Sol sekildi Serik Danııar men Orazǵul Arnur «Negizgi» sanatta jeńis tuǵyryna kóterildi. Sondaı-aq «Robottar fýtbolynda» Sabyr Arystan men Jáńgir Baıanov, Salaýat Nurlan men Nurǵısa Pishenbaev birinshi-ekinshi oryndardy bólisti.
Oblys namysyn qorǵaǵan №42 «Aq nıet» gımnazııasynyń shákirtteri joǵary toptar arasynda «Negizgi» sanatta birinshi orynǵa qol jetkizdi.
Aıta keteıik, jyl saıyn atalmysh olımpıadany «Halyqaralyq robot olımpıadasynyń» Qazaqstandaǵy úılestirýshisi «Nazarbaev zııatkerlik mektepteri» derbes bilim berý uıymy ótkizedi.
Respýblıkalyq olımpıada qorytyndysy boıynsha uıymdastyrylatyn oqý-jattyǵý jıynynan keıin jeńimpazdardan ulttyq qurama jasaqtalady. Bıyl halyqaralyq robot tehnıkasy olımpıadasy kúzde Kosta-Rıka elinde ótedi.
