Batysqazaqstandyqtar Reseıden jyl saıyn 1,5 mlrd.-tan astam teńgege sý satyp alady
ASTANA. QazAqparat - Kırov-Shejin sý arnasy jańǵyrtylǵannan keıin Úkimetten jyl saıyn bólinetin 350-400 mln. teńge qarajat únemdeledi.
Bul týraly QR Prezıdenti janyndaǵy Ortalyq kommýnıkatsııalar qyzmetindegi brıfıngte Batys Qazaqstan oblysy ákiminiń birinshi orynbasary Arman Óteǵulov aıtty.
«Kırov-Shejin sý arnasy problemasy sońǵy 4-5 jyl boıy kóterilýde. Ony sheshý 4 kezeńge bólingen. Birinshi kezeń tolyǵymen aıaqtalyp, ekinshi kezeń jumystary atqarylýda. Oblys basshylyǵy Úkimet aldynda osy máseleni kóterip, 856 mln. teńge qarjy bóliný ústinde», - dedi ol.
Sonymen qatar, ol sý arnasy problemasyn sheshýdiń 4 kezeńi tolyq júzege asyrylǵan jaǵdaıda qol jetkiziletin nátıjelerge de toqtaldy.
«Biz jyl saıyn turǵyndar úshin Reseıden 1 mlrd. 600 mln. teńgege eki ózennen jáne Volgograd arnasynan sý satyp alamyz. Eger Kırov-Shejin sý arnasy qosylǵan jaǵdaıda biz jyl saıyn Úkimetten bólinetin 350-400 mln. teńge qarajatty únemdeıtin edik. Sol sebepti bul másele qazir sheshildi, jumystar retimen júrgizilýde. Bıyl 2-shi kezeń jumystary aıaqtalýy tıis. Qazir jumystardyń shamamen 60 paıyzy bitti», - dedi A.Óteǵulov.
