Batysqazaqstandyqtar QR arqyly 51 mln teńge memlekettik qyzmetter aqysyn tólegen
ORAL. QazAqparat – Batysqazaqstandyqtar QR arqyly 51 mln astam teńge memlekettik qyzmetter aqysyn tólegen, dep habarlaıdy QazAqparat tilshisi.
«Azamattarǵa arnalǵan úkimet» memlekettik korporatsııasy BQO boıynsha fılıalynyń baspasóz qyzmeti málim etkenindeı, Memleket basshysy 2021 jylǵy qyrkúıektegi Joldaýynda memlekettik qyzmetterdi alý kezindegi problemalarǵa nazar aýdaryp, bul protsesterdi tolyǵymen tsıfrlandyrýdy tapsyrǵan bolatyn.
Osyǵan oraı ótken jyly «Azamattarǵa arnalǵan úkimet» memlekettik korporatsııasy Kaspi jáne Halyq Bank-pen birlesip, HQO-larda memlekettik bajdy QR kómegimen tóleý servısin engizgen edi.
QR kod arqyly tólem jasaý sııaqty servıster azamattardyń memlekettik qyzmetterdi alý retin jeńildetýge kómektesedi.
Qazir QR kodtyń kómegimen 146 túrli memlekettik qyzmettiń aqysyn tóleýge bolady. Bolashaqta bul tizim tolyqtyrylatyn bolady.
QR kod arqyly memlekettik baj alymyn tóleý Kaspi jáne Halyq Homebank mobıldi qosymshalary arqyly qoljetimdi.
Bir jyl ishinde qazaqstandyqtar QR kodty 700 myńnan astam ret suratyp, 2,8 mlrd teńgeden astam somaǵa tólem jasaǵan.
QR tólemdi belsendi qoldanǵandardyń ishinde Almaty qalasynyń turǵyndary kósh bastap tur, ekinshi orynda qaraǵandylyqtar, odan keıin tizimde astanalyq turǵyndar (tıisinshe 72 052, 63 278, 54 354).
Batysqazaqstandyqtar QR arqyly 27 269 ret jalpy somasy 51 063 420 teńgege memlekettik qyzmetter aqysyn tólegen.
«Servıs engizilgen sátten bastap, biz oń ózgerister baıqap otyrmyz – klıentter ýaqytyn únemdep, operatordyń aldynda otyryp-aq qyzmet aqysyn tólep júr. Kassalardyń júktemesi tómendedi. Sondaı-aq QR kod arqyly tólem jasalǵanda komıssııa alynbaıdy. Osynyń barlyǵy bizge taıaý ýaqytta HQO-daǵy kassalardyń sanyn úshten birge deıin qysqartýǵa múmkindik beredi», - dedi «Azamattarǵa arnalǵan úkimet» memlekettik korporatsııasynyń basqarma tóraǵasy Ádil Qojyqov.
Eske sala keteıik, budan buryn BQO turǵyndarynyń ádemi nómir alýǵa 142 mln teńge jumsaǵanyn jazǵan bolatynbyz.
