Batysqazaqstandyqtar ómirden erte ketken ánshiniń esimin ulyqtady
ORAL. QazAqparat - Shyńǵyrlaý aýdany Almaz aýylynda ómirden erte ketken belgili ánshi-termeshi, Qazaqstannyń eńbek sińirgen ártisi Qalampyr Raqymqyzyn (1949-1988) eske alýǵa arnalǵan «Shyrqa, daýsym, sharyqta!» atty oblystyq termeshiler baıqaýy ótti, dep habarlaıdy «QazAqparat» tilshisi.
Aldymen aýyldyq mádenıet úıinde ánshiniń beınesi salynǵan eskertkish taqta ashyldy.
Aýdan ákimi Albert Esálıev osynaý sharanyń Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵanyndaı, týǵan jerden túlep ushyp, eldiń ardaqtysyna aınala bilgen Qalampyr Raqymqyzyndaı birtýar asyldarymyzdy ulyqtaýǵa arnalǵanyn jetkizip, Almatydan arnaıy kelgen ánshiniń áriptesi, ónerdegi janashyr, qoldaýshysy bola bilgen Gúlbarshyn Jarylǵasynovaǵa alǵysyn aıtty. «Rýhanı jańǵyrý ár aýylda bolýy kerek. Mine, Elbasy tapsyrmasyna sáıkes osy maqsatta Almaz aýylyna ótken jyly 500 mln astam teńge bólinip, jergilikti mektep, mádenıet úıi, feldsherlik-akýsherlik pýnkt jóndelip, qos birdeı jańa kólik berildi. Qaıta túlegen mádenıet úıinde eldiń rýhyn kóteretin mundaı sharalar aldaǵy ýaqytta da uıymdastyrylatyn bolady», - dedi ákim.
Aqyn, jýrnalıst Qarshyǵa Elemesovtiń aıtýynsha, Almazdyń mereıin kótergen termeshiler baıqaýyna oblys ortalyǵy men ár aýdannan kelgen úmitkerler birden úsh án oryndady. Bul rette olardyń án mátinin tolyq bilýi, ıirimderin jetkizýi, dombyra shertý sheberligi, sahna mádenıeti men tártibin saqtaýy esepke alyndy. Almaz aspanynda halyq án-termeleri, Muhıt pen Ǵarıfolla Qurmanǵalıevtiń ánderi, bir kezde Qalampyr shyrqaǵan týyndylar asqaqtady.
Saıys qorytyndysynda belgili ánshi, «Muhıt Meráliuly» qoǵamdyq qorynyń tóraǵasy, QR Mádenıet qaıratkeri Saǵadat Rahmetjanov bastaǵan qazylar alqasynyń sheshimimen Oral qalasynan kelgen Qurmanǵazy atyndaǵy mýzyka kolledjiniń stýdenti Ámına Ǵaınedınova bas júldeni (100 myń teńge) jeńip aldy. Aqjaıyqtyq Zınat Qasymova birinshi, tasqalalyq Beıbit Qajyǵalıev pen qaratóbelik Nurshat Islıamǵalıev ekinshi, Aqjaıyq aýdanynyń taǵy bir ókili Ardaq Omar, shyńǵyrlaýlyq Indıra Nyǵmetova, syrymdyq Armat Aldamjarov úshinshi orynǵa ıe boldy. Olarǵa da aqshalaı syılyqtar tabys etildi. 
