Batysqazaqstandyqtar OQO-men baılanysty nyǵaıta túspek
ORAL. QazAqparat - Oblys ákiminiń birinshi orynbasary Arman Óteǵulov bastaǵan BQO delegatsııasy aýyl sharýashylyǵy men ındýstrıaldy aımaq salasynda atqarylyp jatqan jumystarmen tanysý jáne tájirıbe almasý maqsatynda Ońtústik Qazaqstan oblysynda jumys saparymen boldy, dep habarlaıdy «QazAqparat» tilshisi.
BQO ákiminiń baspasóz qyzmetinen túsken málimetke qaraǵanda, batysqazaqstandyq delegatsııany OQO ákimi Janseıit Túımebaev qabyldap, óńirde atqarylyp jatqan jumystarǵa toqtalyp ótti.
«Ońtústik Qazaqstan negizi agrarly aımaq bolyp keledi. Munda aýyl sharýashylyǵy men shaǵyn orta kásipkerlik salasy jolǵa qoıylǵan. Sonymen qatar áleýeti mol 11 ındýstrııaldy aımaq bolsa, Shymkent qalasynyń ózinde jeńil jáne aýyr ónerkásip oryndary ornalasqan úsh ındýstrııaldy aımaq bar. Jáne de Ońtústik Qazaqstan oblysy respýblıkadaǵy farmatsevtıka klasteri damyǵan birden-bir aımaq bolyp tabylady», - dedi Janseıit Túımebaev.
BQO ákiminiń birinshi orynbasary A.Óteǵulov resmı sapar oblys ákimi A.Kólginovtyń ózge óńirlermen tájirıbe almasý tapsyrmasy aıasynda uıymdastyrylyp otyrǵandyǵyn aıtyp, agroónerkásip baǵyty damyǵan bul aımaqtan úırener úlgi kóp ekendigin jetkizdi.
«Batys Qazaqstanda mal sharýashylyǵy damyǵan. Búginde asyl tuqymdy mal sharýashylyǵy men et eksportynyń áleýetin óristetýdemiz. Máselen, ótken jyly ońtústiktegi mal soıý beketterine 7800 bas mal jiberdik. Sondaı-aq, osy oblystaǵy «Qaıyp Ata» sharýa qojalyǵy mal basyn alýǵa qyzyǵýshylyq tanytyp otyr. Reseıdiń bes birdeı óńirimen shektesetin bizdiń oblys ótken jyly kórshi elge 2100 tonna et jóneltti», - dedi Arman Óteǵulov.
BQO delegatsııasy quramynda kásipkerler men sharýa qojalyqtarynyń ókilderi men aýyl ákimderi bar. Olar ońtústik óńirdegi iri sharýa qojalyqtarynyń jumysymen tanysyp, kooperatıvterdi qurý boıynsha tájirıbe almasty.
Ońtústik Qazaqstanǵa eki kúndik jumys saparymen barǵan delegatsııa ókilderi agroónerkásip keshenin damytýda birlese jumys atqarý maqsatynda Ordabasy men Tóle bı aýdandaryndaǵy birqatar sharýa qojalyqtaryn aralap, jumysymen tanysty. Sonymen qatar óńir kásipkerlerimen kezdesý uıymdastyrylyp, ózara kelissózder júrgizildi.
