Batysqazaqstandyqtar Muhıt Meráliulynyń 175 jyldyǵyn keńinen atap ótti
ORAL. QazAqparat - Halyq kompozıtory, aqyn ári ánshi Muhıt Meráliulynyń 175 jyldyǵyna arnalǵan sharalar Oral qalasynda bastalyp, týǵan jeri Qaratóbe aýdanynda márege jetti.
Elimizdiń ár jerinen arnaıy kelgen ánshi-termeshiler, QR halyq ártisi, Qoja Ahmet ıAsaýı atyndaǵy halyqaralyq qazaq-túrik ýnıversıtetiniń professory, túrkistandyq Qajybek Bekbosyn, «Mádenıet maıtalmany» belgisiniń ıegeri, aqtóbelik Haıdar Óteǵalıev, QR eńbek sińirgen qaıratkeri, batysqazaqstandyq Qatımolla Berdiǵalıev jáne basqa da Muhıt ánderin oryndaýshylar aldymen Saraljyn aýyldyq okrýginde Aqbaqaı qorymyndaǵy Muhıttiń beıitine taǵzym etti. Munda aq shańqan kesene budan on jyl buryn Aqtaýdyń aq tasynan turǵyzylǵan bolatyn. Sonymen qatar aýyldyq okrýg ortalyǵy Qaraqamys aýylyndaǵy Muhıt eskertkishine gúl shoqtary qoıyldy.
Budan keıin, basty mádenı-kópshilik sharalar keń dalanyń tósinde ótip, oǵan qatysýshylardy Qaratóbe aýdanynyń ákimi Ashat Shaharov quttyqtady.
«Bıyl Muhıt babamyzdyń 175 jyldyǵy el táýelsizdiginiń 25 jyldyǵymen tuspa-tus kelip otyr. Ulttyq bolmysymyzdy saqtap, salt-dástúrimizdi nasıhattap, aqyndardy ardaqtap, batyrlarymyzdy ulyqtaýdan jalyqpaıtyn halqymyzdyń mártebesi qashanda bıik. Qazirgi tańda urpaqtarynyń qoly jetken azattyqty ańsap ótken uly babalarymyz az bolmaǵan. Sonyń biri óner salasynda óshpes iz qaldyrǵan jeztańdaı ánshi, halyq kompozıtory, keń baıtaq dalamyzdyń bulbuly Muhıt Meráliuly ekendigi anyq. Onyń ólmes murasyn nasıhattaý arqyly biz máńgilik elge baǵyt ustap, nyq qadammen alǵa asa beretin bolamyz», dedi aýdan basshysy.
Saltanatty sharada sondaı-aq BQO mádenıet, muraǵattar jáne qujattama basqarmasynyń basshysy Dáýletkereı Qusaıynov, QR halyq ártisi Qajybek Bekbosyn, sal Muhıttyń urpaǵy Ásııa Muhıtova sóz alyp, jurtshylyqty merekemen quttyqtady.
Qazaqstan óńirlerinen kelgen ánshiler Muhıttyń ánderin áýelete shyrqap, keń dalany jańǵyrtty. «Sary dala saǵynyshy - sal Muhıt» atty óner festıvaline qatysýshylardyń barlyǵyna kádesyılar usynyldy.
Budan keıin baba mereıtoıy sporttyq oıyndar men dala qyzyqtaryna jalǵasyp, jeńimpazdar aqshalaı jáne zattaı syılyqtarǵa ıe boldy. Mysaly, 25 shaqyrymdyq alaman báıgede aty ozyp kelgen Syrym aýdany Kózdiqara aýylynyń turǵyny Serik Mútıevke 1 mln. teńge tabys etildi.
