Batysqazaqstandyqtar qolóner kórmesin Astana toıyna arnady
ORAL. QazAqparat - Oralda Astana qalasynyń 20 jyldyǵyna oraı «Aqjaıyq - sheberler qalasy» atty qolóner buıymdarynyń kórmesi ótti, dep habarlaıdy QazAqparat tilshisi.
Kórmeni uıymdastyrǵan «Ǵylymı zertteýdi qoldaý qory» jeke qorynyń basshysy Aıbolat Qurymbaevtyń aıtýynsha, dástúrli kórmege óńirdegi júzge jýyq sheberler qatysyp, óz buıymdaryn qoıdy.
Kelýshilerge ulttyq kıimder, ydys-aıaq, tastan, aǵash pen súıekten jasalǵan, matadan tigilgen buıymdar, áshekeıler, kádesyılar, sómke, sebetter usynyldy.
Bıyl úshinshi márte ótkizilgen kórmege qatysýshylar sany artyp keledi. Bul joly mektep oqýshylary da kelip, óz sýretterin kórsetýge múmkindik aldy. Tek kórmemen shektelmeı, oqýshylar arasynda asyq atý, beltemirge tartylý, arqan tartý sekildi jarystar ótkizildi.
A.Qurymbaevtyń sózine qaraǵanda, aldaǵy ýaqytta kórmeni halyqaralyq deńgeıde uıymdastyrý kózdelýde. Qazirdiń ózinde orynborlyq ismerler sharaǵa qatysýǵa tilek bildirip otyr. Orynborda halyq shyǵarmashylyǵy ortalyǵy bar, sodan onnan astam sheberdiń kelýi úshin uıymdastyrý máselesi sheshilýde. Batys Qazaqstanda 120-dan astam halyq sheberi bar, solardyń usynys-tilekterin eskere otyryp, kórme aıasyn keńeıtý, sheberlik saǵattaryn, oqytý semınarlaryn ótkizý kózdelýde.
Aıta keteıik, kelesi kórme 27 mamyrda ótpekshi.
