Batysqazaqstandyqtar Azıada júldegerlerine qoshemet kórsetti

Negizinen Aq Jaıyq oıynshylarynan quralǵan Qazaqstan dopty hokkeı quramasy altyn medaldy ıelense, shorttrekshiler qos qola júldeni enshilegen bolatyn. Búgin ushaqtan túsken sportshylarǵa shashý shashyp, aq jol tilegen BQO týrızm, dene shynyqtyrý jáne sport basqarmasynyń qyzmetkerleri azıadashylardy eń aldymen tamasha jeńisterimen quttyqtady. Budan soń short-trekten QR ulttyq quramasynyń bas jattyqtyrýshysy Mádiǵalı Qarsybekov pen dopty hokkeıden ulttyq quramanyń bas bapkeri Alekseı Nıkıshov jeńimpaz sportshylar atynan shyǵyp sóılep, Azıada oıyndarynan alǵan áserlerimen bólisti.

Dopty hokkeıden el quramasynyń komanda bastyǵy Marat Mańǵýbaevtyń atap ótkenindeı, qysqy Azıadada qazaqstandyq jigitter oıynnyń úzdik úlgisin kórsetti. Dopty hokkeıden QR ulttyq quramasynyń negizgi bóligin, ıaǵnı 90 paıyzyn batysqazaqstandyq oıynshylar qurady. «Azıadadan keıin bizdi Elbasy N.Nazarbaev qabyldady. 27 memleket qatysqan baıraqty básekede el mártebesin kótergenimiz úshin Nursultan Ábishuly bizge rızashylyǵyn bildirip, alǵysyn aıtty», dedi ol.

Muz aıdyny sport saraıynyń dırektory Esqabyl Jalmurzıevtiń aıtýynsha, short-trekshiler mundaı dodada tuńǵysh ret olja saldy. Sporttyń bul túri elimizde kenje qalsa da, Qysqy Azııa oıyndarynda short-trekshiler alǵashqy úshtikten oryn aldy. Bul - úlken jetistik. Short-trekten QR ulttyq qurama sapynda óner kórsetken sportshylardyń 80 paıyzy - oraldyqtar. Short-trekshilerdiń osyndaı tabysqa jetýine Mádiǵalı Qarsybekov pen Jasulan Muhambetqalıev syndy jattyqtyrýshylardyń sińirgen eńbegi zor.