Batysqazaqstandyqtar álem chempıonatynyń kúmis júldegeri Nurlan Bekjanovqa qurmet kórsetti
ORAL. QazAqparat - Aq Jaıyq jurtshylyǵy jýyrda Býdapesht qalasynda erkin kúresten ótken álem chempıonatynyń kúmis júldegeri atanǵan Nurlan Bekjanovty Oral áýejaıynan kútip alyp, qurmet kórsetti, dep habarlaıdy QazAqparat tilshisi.
Olımpıadalyq emes salmaq dárejeleri boıynsha alǵash ret uıymdastyrylǵan dúnıejúzilik dodada Nurlan 70 keli salmaqta tórt qarsylasyn utyp, tek fınalda ǵana reseılik Magomed Kýrbanalıevke jol bergen bolatyn. Eń bastysy, ol eresekter arasynda álem chempıonatynyń fınalyna shyqqan tuńǵysh qazaq palýany retinde tarıhqa endi. Batys Qazaqstannyń Syrym aýdany Buldyrty aýylynan túlep ushqan Nurlan Bekjanovtyń Astanadaǵy qazirgi jattyqtyrýshysy - Asqar Ábdirashev.
Osyndaı tabyspen týǵan jerine oralǵan N.Bekjanovty kútip alýshylar qatarynda onyń alǵashqy bapkeri, KSRO sport sheberi Asqar Saýkelın de boldy. «Nurlandaı shákirtimizdiń barlyǵyna maqtanamyz. Ol - talantyna qosa eńbekqor. Álem birinshiliginde kúmis júldeger atanýy - tynbaı jattyǵýdyń arqasy. Mine, osyndaı qasıetimen Nurlan keıingi jastarǵa úlgi bolmaq», - dedi A.Saýkelın.
Aıta keteıik, Nurlan Bekjanov erteń dańqty palýan, erkin kúresten 1973 jylǵy KSRO chempıonatynyń qola júldegeri, kóptegen jarystardyń jeńimpazy, Keńes dáýirinde odaq kóleminde oza shaýyp júrse de, dúnıejúzilik dodaǵa shyǵa almaǵan Saılaý Muqashevtyń júldesi úshin ótetin respýblıkalyq ashyq týrnırdiń qurmetti qonaǵy bolmaq. 
