Batysqazaqstandyq jyrshy Farhat Orazov Atyraýda ótken baıqaýdyń bas júldesin jeńip aldy

ORAL. QazAqparat - Batysqazaqstandyq jyrshy Farhat Orazov Atyraýda QR Táýelsizdiginiń 25 jyldyǵyna oraı márege jetken «Jasaı ber, qazaq eli» atty respýblıkalyq jyraýlar baıqaýynyń jeńimpazy atandy, dep habarlaıdy QazAqparat tilshisi.

Atyraý oblystyq din isteri basqarmasy, «Shapaǵat» qoǵamdyq qory uıymdastyrǵan óner saıysyna 30 adam aldyn ala aýdıojazbalaryn jibergen. Solardyń ishinen 10 jyrshy iriktelinip alynsa, sonyń jeteýi Astana, Almaty qalalary men Mańǵystaý, Batys Qazaqstan jáne Atyraý oblysy atynan qorytyndy synǵa túsken. Bas júldeni (1 mln. teńge) Farhat Orazov jeńip alsa, almatylyq Serik Adaı birinshi oryndy ıelendi. Basqa da júldegerlerge dıplomdar men aqshalaı syılyqtar tabys etildi.

 

Aıta keteıik, bul - Farhat Orazovtyń bıylǵy jyly alyp otyrǵan ekinshi bas júldesi. Budan buryn ol Oralda qarasha aıynda ótken Jaqsylyq Sársenǵalıev, Qalamqas Orasheva jáne Qalampyr Rahımovany eske alýǵa arnalǵan «Termeletip jyrlaıyn» atty respýblıkalyq termeshiler baıqaýynyń jeńimpazy atanǵan edi. Oǵan qosa Bashqurtstan astanasy Ýfa qalasynda 23-24 qazanda ótken búkilreseılik jyrshylar (sesender) festıvaliniń kúmis júldegeri  jáne Almaty qalasynda qarasha aıynda «Tekti sózdiń tóresi - terme» jyrshy-termeshilerdiń respýblıkalyq baıqaýynyń ekinshi oryn ıegeri atanǵan bolatyn.