Batysqazaqstandyq jastar jańa jobalardy qolǵa alyp otyr
ORAL. QazAqparat - Oblys ákimi Altaı Kólginovtiń «Bastaý» kovorkıng ortalyǵynda ótken jastarmen kezdesýinde jańa jobalar ortaǵa salyndy, dep habarlaıdy «QazAqparat» tilshisi.
Ashyq alań túrinde ótken kezdesýde óńir basshysy jastarmen erkin áńgimelesip, olardyń usynys-pikirlerine qulaq túrdi. Oblystyq jastarmen jumys jónindegi resýrstyq ortalyq usynǵan jobanyń biri - «Jetistikke 100 qadam». Jobany uıymdastyrýshylardyń aıtýynsha, kóshbasshylyq, ózin-ózi damytý, kásipkerlikti qolǵa alý taqyryptaryndaǵy jastarǵa arnalǵan 100 úzdik kitaptyń tizimi jasalmaqshy. Sodan keıin bul kitaptar demeýshilerdiń kómegimen satyp alynyp, kovorkıng ortalyqtarynda, qala men aýyl kitaphanalarynda qoıylady.
Oblys ákimine sondaı-aq «Boıjetken» klýbynyń jobasy tanystyryldy. Joba maqsaty - ulttyq salt-dástúrler negizinde qazirgi qoǵamdaǵy qyzdar tárbıesine úles qosý.
«Bastaý» kovorkıng ortalyǵynda robot tehnıkasy, aǵylshyn tili, tigin óneri men qolóner, dombyra tartýǵa úıretý boıynsha sheberlik saǵattary tegin júrgizilýde. «Jastar nazaryna!» jobasy áleýmettik jelilerde túrli aqparattyq rolıkter men býkletter, kovorkıng ortalyqtarynda stendilerdi daıyndap, ornalastyrýǵa baǵyttalǵan.
Kezdesýde jas kásipkerler, shyǵarmashyl belsendi jastar men blogerler óz tájirıbelerimen bólisti. Oblys ákimi qala men aýylda bolsyn, jastardyń óz isterin qolǵa alyp, damytýyna barlyq jaǵdaı jasalyp otyrǵanyn, osy oraıda tyń jobalardy qoldaıtynyn jetkizdi.
Aıta keteıik, óńirde 14-29 jas aralyǵynda 140 myńnan astam jas bar, bul oblys halqynyń 21 paıyzyn quraıdy. Sonyń ishinde 30508-i óńirdegi tórt joǵary oqý ornynda, 19 myńy 38 arnaýly orta oqý oryndarynda bilim alýda. Oblysta 89 jastar qoǵamdyq birlestikteri qyzmet etedi.
