Batysqazaqstandyq jas ǵalym Prezıdent qory syılyǵynyń laýreaty atanyp oraldy
ORAL. QazAqparat - Jáńgir han atyndaǵy Batys Qazaqstan agrarlyq-tehnıkalyq ýnıversıteti mashına jasaý fakýlteti qurylys jáne qurylys materıaldary kafedrasynyń meńgerýshisi, tehnıka ǵylymdarynyń kandıdaty, dotsent Nurgúl Ádilova Astanadan tuńǵysh Prezıdent qory syılyǵynyń laýreaty atanyp oraldy, dep habarlaıdy «QazAqparat» HAA tilshisi.
Nurgúl Bolatqyzynyń aıtýynsha, mádenıet jáne óner, bilim, densaýlyq saqtaý syndy salalar boıynsha barlyǵy 18 adam laýreat atandy.
«Bul - men úshin úlken qýanysh. Búginde ataǵy álemge jaıylǵan jas estrada ánshisi Dımash Qudaıbergen sııaqty jas daryndarmen birge Elbasy qorynyń syılyǵymen marapattalýym meni de bıik mejelerge jeteleıdi. Qazirgi kezde «Kompozıttik shıkizat negizinde jeńil, keýekti túıirshiktelgen jylý oqshaýlaǵysh materıaldyń tehnologııasy» degen ǵylymı jumysymdy jetildirý ústindemin. Aldaǵy ýaqytta da óndiriske tyń jańalyqtardy engizý baǵytynda jumystanyp, elimizdiń damýyna óz úlesimdi qosatyn bolamyn», dedi «QazAqparat» tilshisine N.Ádilova.
Aıta keteıik, Prezıdent qory syılyǵyna úmitkerlerden bıyl 127 ótinim túsken. 2008 jyldan bastaý alǵannan beri 160-tan astam adam laýreat atandy. Al Nurgúl Ádilova budan buryn 2016 jyldyń qorytyndysy boıynsha QR Bilim jáne ǵylym mınıstrligi jarııalaǵan «Joǵary oqý ornynyń úzdik oqytýshysy» respýblıkalyq baıqaýynyń grantyn jeńip alǵan bolatyn. 
