Batysqazaqstandyq jas dzıýdoshylar Saratovta ótken týrnırden tabyspen oraldy
ORAL. QazAqparat - Batysqazaqstandyq dzıýdoshylar Saratovta dzıýdo kúresinen 1997-1999 jylǵy jastar men qyzdar jáne 2000-2002 jylǵy jasóspirimder men qyzdar arasynda qalanyń ashyq kýbogy úshin ótken jarystan tabyspen oraldy.
Sportqa daryndy balalarǵa arnalǵan mamandandyrylǵan oblystyq mektep-ınternattan túsken málimetke qaraǵanda, atap aıtqanda, Nursultan Zaızaǵalıev 46 kg, Erlan Ońalov 50 kg jáne Mansur Qýanyshov 55 kg salmaqta qarsylas shaq keltirmeı, chempıon atandy. Sondaı-aq, Mıras Erbolatov 66 kg, Shyńǵys Meńdibaev 55 kg, Dáýren Zakareev +100 kg salmaqta kúmis júldeni ıelense, Shyńǵys Shadrahman 60 kg, Bıbarys Nuralıev 55 kg salmaqta úshinshi orynnan kórindi.
Jas dzıýdoshylardy Narıman Bekqalıev jattyqtyryp keledi.
Aıta keteıik, atalmysh mektep shákirtteri basqa da jarystardan oljaly oralýda. Mysaly, Aqtóbe oblysy Shalqar qalasynda el táýelsizdiginiń 25 jyldyǵyna oraı grek-rım kúresinen Murat Esenjolov pen Máýlen Kópesovti eske alýǵa arnalǵan 2001-2002, 2003-2004 jylǵy jasóspirimder arasynda ótken oblystyq ashyq týrnırde Mırlanbek Amangelıev (39 kg) birinshi, Eljas Samıǵýllın (47 kg) men Sanjar Lekerov (53 kg) úshinshi oryndy enshiledi. Bul palýandardyń bapkeri - Artýr Úmbetqalıev.
