Batysqazaqstandyq jáne samaralyq ardagerler birlesip jumys jasamaq
ORAL. QazAqparat - Batysqazaqstandyq jáne samaralyq ardagerler birlesip jumys jasamaq. Bul týraly «Ardagerler uıymy» respýblıkalyq qoǵamdyq birlestigi BQO fılıalynyń tóraǵasy Myrzaǵalı Muhambetov málim etti, dep habarlaıdy «QazAqparat» HAA tilshisi.
Onyń aıtýynsha, Reseıdiń kórshiles óńirlerimen burynnan qarym-qatynas bolǵanymen, bul joly Samara oblystyq ardagerler uıymynyń tóraǵasy Ivan Saharov bastaǵan meımandar Oralǵa arnaıy keldi. Bıyl respýblıkalyq ardagerler uıymyna 30 jyl tolǵaly otyr. Osyǵan oraı Reseıdiń Samara jáne Orynbor oblystarynan kelgen ardagerlerdi BQO ákiminiń orynbasary Baǵdat Azbaev arnaıy qabyldap, eki jaqty tıimdi baılanystyń odan ári óristeýine tilektestigin bildirdi. Sodan keıin Batys Qazaqstan jáne Samara oblystyq ardagerler uıymdary arasynda yntymaqtastyq jónindegi memorandýmǵa qol qoıyldy. Uıymdar bir-birimen eskertkish syılyqtarmen almasqannan keıin shara Ǵ.Qurmanǵalıev atyndaǵy oblystyq fılarmonııa ártisteri qoıǵan kontsertke ulasty.
«Bizder ózara tájirıbe almasyp, burynǵydan da tyǵyz baılanys jasamaqpyz. Bir-birimizge baryp, tatý-tátti kórshilik pen dostyqty nyǵaıtý maqsatynda mádenı-kópshilik sharalar uıymdastyratyn bolamyz. Mysaly, osy joly Oralda ardagerler arasynda balyq aýlaýdan halyqaralyq jarys ótkizdik», dedi «QazAqparat» tilshisine M.Muhambetov.
Aıta keteıik, balyq aýlaý saıysyna Samara, Orynbor, Atyraý jáne Batys Qazaqstan oblystarynan barlyǵy 12 komanda qatysty. Jarys qorytyndysynda «Oral «Zenıt» zaýyty» AQ, Orynbor qalasy, "KazTransCom" AQ júldeli oryndardy bólisti. Jeńimpaz-júldegerler medal, dıplomdarmen, syılyqtarmen marapattaldy. Balyq aýlaý jarysyna «QPO b.v.» kompanııasy men «KazArmaProm» AQ demeýshilik etti.
