Batysqazaqstandyq voleıbolshy qyzdar Ýfada ótken týrnırde kúmis júldeger atandy
ORAL. QazAqparat - Oraldyń «Gratsııa-KZ» komandasy voleıboldan 2005-2006 jylǵy qyzdar arasynda Bashqurtstan astanasy Ýfa qalasynda ótken halyqaralyq týrnırde kúmis júldeger atandy, dep habarlaıdy «QazAqparat» HAA tilshisi.
Ýfadaǵy №34 balalar sport mektebinde ótken jarysqa barlyǵy segiz komanda qatyssa, sonyń teń jartysy Bashqurtstannan edi. Komandalar eki topqa bólinip, eń úzdikteri jartylaı fınalǵa joldama aldy. Úshinshi oryn úshin básekede «Olımp» (Neftekamsk) komandasy Salaýat qalasynyń ókilderin utty. Al fınalda asa tartysty básekede №34 balalar sport mektebiniń komandasy oraldyqtardy jeńdi.
«Gratsııa-KZ» komandasyn kópten jattyqtyryp kele jatqan Kóleńke Ǵubashevtiń aıtýynsha, batysqazaqstandyqtar budan buryn da halyqaralyq týrnırlerde sátti óner kórsetken bolatyn. Bul joly olar ekinshi orynǵa kóterilip qana qoımaı, voleıboldan Reseı quramasynyń ataqty oıynshylarymen kezdesip, sýretke de tústi.
