Batysqazaqstandyq ýnıversıtette stýdentterge qyzmet kórsetý ortalyǵy ashyldy
«Tsıfrlyq Qazaqstan» memlekettik baǵdarlamasy aıasynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń qoldaýymen Qazaqstannyń batys óńirinde alǵashqy bolyp iske qosylǵan atalmysh ortalyq «bir tereze» qaǵıdaty boıynsha osy ýnıversıtette bilim alatyn 5 myńnan astam stýdentke tez de sapaly qyzmet kórsetedi.
Ortalyqtyń ashylý rásimine qatysqan oblys ákimi Altaı Kólginov Memleket basshysy jańa Joldaýynda aldaǵy jyldy «Jastar jyly» dep jarııalaǵanyn atap ótti. Osyǵan oraı elimizdiń damýyna maman ári táýelsiz eldiń azamaty retinde qandaı úles qosa alatyny jóninde jastar da oılanýy kerek.
«Elbasy bilim salasyna táýelsizdik alǵan alǵashqy jyldardan beri aıryqsha nazar aýdaryp keledi. «Bolashaq» baǵdarlamasy iske qosyldy, Nazarbaev ýnıversıteti, zııatkerlik mektepteri jumys jasaýda. Lıtseıler jańa qural-jabdyqtarmen qamtylýda. Prezıdenttiń bes áleýmettik tapsyrmasyna sáıkes qosymsha granttar bólinýde. Sol grant ıeleri osy ýnıversıtette de bilim alýda. Ekinshiden, qazir tsıfrlandyrý baǵytynda kóptegen jumystar qolǵa alynýda. Jumystyń bári avtomattandyrylǵannan keıin ol jerde sanaýly mamandar ǵana jumys jasaıtyn bolady. Aldyńǵy qatarly memleketter qataryna tek bilim arqyly ǵana jete alamyz. Sondyqtan búgingi ortalyq ta stýdentterdiń jan-jaqty bilim alýyna septesetin bolady», dedi óńir basshysy.
Ýnıversıtet rektory Asqar Námetov osylaısha «Smart ýnıversıtet» jobasynyń júzege asyryla bastaǵanyn, atalmysh ortalyqtan oqytýshylar da kóptegen qyzmet túrin jedel ala alatynyn jetkizdi.
Aıta keteıik, ortalyqta oqý ornyndaǵy bes fakýltetke arnaıy tereze jasaqtalǵan. Taǵy bireýinde qurylym basshysy men esepshi otyrady. Bilim alýshylarǵa barlyǵy 35 qyzmet túri kórsetiledi. Stýdentter aldaǵy jyldyń 1 qańtarynan bul qyzmetterdi onlaın jolymen de ala alady. Ár stýdenttiń ózi biletin qupııasózben qulyptanǵan jeke keńsesi bolady, onda bilim alýshyǵa qatysty barlyq málimet jınaqtalady.