Batysqazaqstandyq túlekter ortasha 81,25 ball jınady
ORAL. QazAqparat - Batys Qazaqstan oblysynda bıyl 4735 túlek mektep bitirse, sonyń 3307-si nemese 69,84 paıyzy (ótken jyly - 71,25 paıyz) UBT synaǵyn tapsyrdy.
Oblystyq bilim basqarmasynan túsken málimetke qaraǵanda, batysqazaqstandyq mektep bitirýshilerdiń ortasha baly - 81,25, bul ótken jylǵydan (78,15) joǵary. «Altyn belgiden» 221 úmitkerdiń 112-si nemese 50,6 paıyzy (2013 jyly - 44,02 paıyz), erekshe attestattan dámeli 97 jastyń 27-si nemese 27,83 paıyzy (2013 jyly - 28,3 paıyz) óz bilimderin qorǵap shyqty. Oblys boıynsha Aqsaı qalasyndaǵy №4 orta mektepten Aqmaral Meńdeeva men Terekti aýdanyndaǵy «Úmit» tilder gımnazııasynan Nurlan Azamatov eń joǵary 123 ball jınady. 45 túlek QR Bilim jáne ǵylym mınıstriniń bıylǵy 23 mamyrdaǵy №172 buıryǵy negizinde halyqaralyq olımpıada jeńimpazy retinde UBT-dan bosatylǵan bolatyn. Bir eskeretin jaıt, 4 maýsym kúngi UBT synaǵy boıynsha apellıatsııalyq jumystar qorytyndysyna sáıkes testileý nátıjesi áli de ózgerýi múmkin.
