Batysqazaqstandyq tilshi «Qazaqstannyń qurmetti jýrnalısi» atandy
ORAL. QazAqparat - Belgili jýrnalıst, 100 jyldyq tarıhy bar Batys Qazaqstan oblystyq «Oral óńiri» gazeti bas redaktorynyń orynbasary Esenjol Qystaýbaevqa «Qazaqstannyń qurmetti jýrnalısi» ataǵy berildi, dep habarlaıdy «QazAqparat» tilshisi.
Bıyl 63 jasqa tolatyn Esenjol Jumaǵululy «Oral óńiri» gazetinde 1977 jyldan beri, ıaǵnı qyryq jyl boıy taban aýdarmastan qyzmet atqaryp keledi. Aýdarmashy, tilshilikten 2004 jyly bas redaktordyń orynbasarlyǵyna deıin kóterilgen tájirıbeli jýrnalıst túrli taqyryptarǵa ózi de qalam silteýmen birge keıingi býyn jastardan aqyl-keńesin aıaǵan emes.
Uzaq jylǵy qajyrly da ónimdi eńbegi úshin QR Prezıdentiniń Qurmet gramotasymen, QR Mádenıet qaıratkeri belgisimen jáne «Eren eńbegi úshin» medalimen marapattalǵan qalamger ár jyldary jýrnalıster arasynda jarııalanǵan baıqaý-báıgelerdiń de jeńimpazy boldy.
Tili nárli, qalamy qarymdy Esenjol Qystaýbaevty Aq Jaıyq jurtshylyǵy jaqsy biledi. Ásirese, oqyrmandar onyń syn maqalalaryn izdep júrip oqıdy. Bıyldyń ózinde aýyldardaǵy qarapaıym turǵyndardy opyq jegizip otyrǵan mal urlyǵy, oǵan qatysy bar polıtsııa qyzmetkerleri týraly serııalyq jarııalanymdary serpilis týǵyzyp, oblystyq ishki ister departamentinde arnaıy jıyn ótkizýge túrtki boldy. Ol sondaı-aq kórkem áńgime jazýmen aınalysady, oqıǵalardy qaz-qalpynda sýretteýge sheber. Aldaǵy shilde aıynda ǵasyrlyq toıy atalyp ótiletin «Oral óńiri» gazetiniń arǵy-bergi tarıhyn túgendeýge de óziniń súbeli úlesin qosty.
