Batysqazaqstandyq teatr Shekspırdiń «Gamletin» sahnalady
ORAL. QazAqparat - Batys Qazaqstan oblystyq qazaq drama teatrynda ataqty aǵylshyn dramatýrgi Ýılıam Shekspırdiń «Gamlet» tragedııasy qoıyldy, dep habarlaıdy «QazAqparat» HAA tilshisi.
Spektakldi rejısser Jiger Myrzalıev sahnalasa, sýretshisi - mádenıet salasynyń úzdigi Qaıyr Orazǵalıev. Premeranyń alǵashqy kúni Gamlet rolinde teatrdyń jas ártisteriniń biri Dýman Omarov oınasa, korol Klavdııdi Qazaqstannyń eńbek sińirgen qaıratkeri Erbol Esendosov, Gertrýdany mádenıet salasynyń úzdigi Horlan Shamelova somdady. Sondaı-aq Talıǵat Jigerov, Manas Kenjetaev, Renat Sabyrǵalıev, Áıgerim Saǵadenova syndy ártister de óz rolderin alyp shyqty deýge bolady.
Shekspır «Gamlet» tragedııasyn 1601-1602 jyldary jazsa da, sodan beri bul shyǵarma álemdik sahnalarda talaı ret qoıyldy. Sonyń ishinde qazaqstandyq teatrlar bul taqyrypqa bardy. Álemdik deńgeıdegi týyndyny meńgerý úshin, árıne, úlken sheberlik pen kásibı biliktilik kerek. Buǵan deıin kóptegen shyǵarmalardy sahnalap, halyqaralyq baıqaýlardyń júldesin alyp úlgergen batysqazaqstandyq teatrdyń «Gamletke» qol sozýy oryndy. Ákesin óltirgen Klavdııdiń sheshesine úılenip, taqqa otyrǵanyn bilgen Gamlet aqyry kek alyp tynady. Oǵan arnalǵan ýdy ishken Gertrýda da, jekpe-jekte ýlanǵan rapıradan qarsylasy Laert te, ózi de óledi. Bul irip-shirigen qoǵamnyń túbi jaqsylyqqa aparmaıtynyn bildiredi. Jalpy, patsha saraıy tóńiregindegi satqyndyq pen azǵyndyq, enjarlyq pen jalǵandyq, bylyq ataýlynyń bári oılandyrmaı qoımaıdy. Mundaı sum jalǵannyń adal adamǵa qaı kezde de túrme kórinetini anyq. Sonyń bárimen kúresken Gamlet ózi tiri qalmasa da, sol is-áreketimen kópke úlgi qaldyryp ketti. Eń bastysy, kórermenge oı tastaı bilse, qoıylym maqsatynyń oryndalǵany.
