Batysqazaqstandyq taekvondoshy Azııa chempıonatynyń júldegeri atandy
ORAL. QazAqparat – Batysqazaqstandyq Tamır Qýatov Ammanda (Iordanııa) taekvondodan (WTF) jasóspirimder arasynda ótken Azııa chempıonatynyń kúmis júldegeri atandy, dep habarlaıdy QazAqparat tilshisi.
T.Qýatov olımpıadalyq oıyn túri – taekvondodan (WTF) 53 kelige deıingi salmaqta júldege ilikti.
Jattyqtyrýshysy Arslan Ordabaevtyń aıtýynsha, Tamır kadetter arasynda fınalǵa deıin vetnamdyq, gonkongtyq jáne ırandyq qarsylastaryn utty. Tek sońǵy básekede ǵana taıpeılik sportshyǵa jol berdi.
BQO dene shynyqtyrý jáne sport basqarmasynan túsken málimetke qaraǵanda, Tamırdiń týǵan aǵasy Shyńǵys ta taekvondomen aınalysady. Ol – jastar arasyndaǵy Qazaqstan chempıonatynyń júldegeri.
Eske sala keteıik, budan eki jyl buryn óńirde jasóspirimder arasynda Lıana Kýshkeeva taekvondodan Azııa chempıony atanǵan bolatyn.
