Batysqazaqstandyq sportshylarǵa jan-jaqty qoldaý kórsetiledi

Óńir basshysynyń aıtýynsha, oblys sportshylarymen osyndaı birneshe júzdesý josparlanǵan. Munyń aldynda olımpıadalyq oıyn túrleri ókilderimen kezdesý ótkizilgen bolatyn. Bul joly sambo, shahmat, aýdaryspaq, eskek esý, dzıýdo jáne qol kúresinen erekshe kózge túsip júrgenderge kezek keldi.
 

Aldaǵy ýaqytta jeńil atletıka jáne qysqy oıyn túrleriniń sheberleri men mamandary óz oı-tolǵamdaryn ortaǵa salmaq.
 

Elbasy tapsyrmasyna sáıkes óńirde jalpy kópshiliktiń de sportpen aınalysýyna erekshe kóńil bólinýde. Salada tabys-jetistikter az emes. Mysaly, batysqazaqstandyq short trekshiler 2018 jyly Phenchhan qalasynda ótetin qysqy olımpıada oıyndarynda el namysyn qorǵaıtyn bolady. Sol sekildi dopty hokkeıdiń Oralda jaqsy damyǵany belgili. Qazirgi kezde «Jastar» stadıony qaıta qurylýda, onda jasandy muz aıdyny salynyp, iske qosylǵannan keıin hokkeıshiler +10 gradýsqa deıingi jyly kúnderi de jattyǵa alady. Bul - dopty hokkeıden Reseı chempıonatynda óner kórsetetin, aldy Qazaqstan quramasy sapynda oınaıtyn «Aqjaıyq» hokkeıshileri úshin jaqsy múmkindik. Stadıonda sonymen qatar respýblıkalyq qana emes, halyqaralyq deńgeıdegi jarystardy ótkizýge bolady.
Oblysta bolashaǵynan úlken úmit kúttiretin jastar az emes. Sonyń biri - budan eki jyl buryn 17 jasqa deıingi jasóspirimder arasynda shahmattan álem chempıonatynda absolıýtti jeńimpaz atanǵan Janat Saıyn. Onyń bapkeri Marat Qazekenovtiń sózine qaraǵanda, Janat kelesi jyly dúnıejúzilik olımpıadaǵa qatysý úshin Qazaqstan erler quramasyna alynatyn bolady. Mine, sol kezde oǵan halyqaralyq deńgeıdegi jattyqtyrýshy kerek. Osyǵan oraı oblys basshysy Janat Saıynnyń astanalyq bapkerlerden tálim alýy kerektigi týraly usynys bildirdi. Bul másele kóp uzamaı sheshiletin bolady.
Qol kúresinen Azııa chempıonaty men dúnıejúzilik dodalarda olja salyp júrgen Kenjeqyz Qaýpenovanyń bapkeri Murat Ibatov sportshylardyń bir orynda turyp qalmaýy úshin arnaıy trenajerler kerektigin jetkizdi. Eskek esýden birneshe ret olımpıada oıyndaryna qatysqan Aleksandr Dergýnov pen onyń jattyqtyrýshysy, osy sport túrinen 1986 jyly álem chempıony atanǵan Aleksandr Akýnıshnıkov bazany tolyqtaı jańǵyrtý qajettigin eske saldy. Sol sekildi aýdaryspaqtan jattyqtyrýshy Aqtilek Sársenov sportshylar ulttyq sport túrlerinen túrli jarystarda júlde alyp júrgenimen, Oralda jaqsy jasaqtalǵan báıge alańy joqtyǵyn aıtty.
Osyndaı máselelerdiń birte-birte sheshiletinin atap ótken Altaı Kólginov oblystyq dene shynyqtyrý jáne sport basqarmasynyń basshysy Ásııa Amanbaevaǵa tapsyrmalar berdi.
Basqosý sońynda jarqyn jeńisterge qol jetkizgen sportshylarǵa alǵys hattar tabys etildi.