Batysqazaqstandyq sportshylar respýblıkalyq týrnırlerde top jardy
ORAL. QazAqparat - 4-6 qarasha kúnderi Óskemen qalasynda erkin kúresten 2001-2003 jylǵy jasóspirimder arasynda ótken Qazaqstan chempıonatynda qos birdeı batysqazaqstandyq palýan júldege ıe boldy, dep habarlaıdy QazAqparat.
Sportqa daryndy balalarǵa arnalǵan mamandandyrylǵan oblystyq mektep-ınternattan túsken málimetke qaraǵanda, Álıhan Demenov 42 kg salmaqta chempıon atansa, Nurjan Isaǵalıev (69 kg) qola júldeni enshiledi. Olardy Musabek Naregeev, Dýlat Samıev, Gúljanat Qojaǵalıeva baptaıdy. Sondaı-aq erkin kúresten jastar arasynda BQO quramasynyń aǵa jattyqtyrýshysy Rınat Aıjaryqovtyń qosqan úlesi mol. 2013 jyly 7-synypta sport-ınternatqa kelgen Álıhan bıyl Oraldaǵy №10 mektepke, sol sekildi bir jyl tálim alǵan Nurjan Syrym aýdanyndaǵy Buldyrty mektebine aýysty.
Atalǵan mektep-ınternattyń shákirtteri Qyzylorda qalasynda bokstan 2001-2002 jylǵy qyzdar jáne 2003-2004 jylǵy jasóspirimder arasynda QR táýelsizdiginiń 25 jyldyǵyna jáne Jalańtós bahadúrdi eske alýǵa arnalǵan H respýblıkalyq týrnırde de top jardy. Atap aıtqanda, Bısultan Darenov (30 kg), Sanjar Marksov (34 kg), Ámir Seıilhan (32 kg) jeńimpaz atansa, Lýnara Alhamova (50 kg), Nurbergen Ermekov (34 kg) úshinshi oryndy ıelendi. 
