Batysqazaqstandyq sportshylar Elbasy Joldaýyn naqty ispen qoldaıdy - M.Ońdaǵanov

Osy maqsatta aqpannyń 13-i, senbi kúni Oraldaǵy qalalyq mádenıet jáne demalys saıabaǵynda bir myń sportshy saıysqa túspek. Aıtýly sharaǵa oblysymyzdan saılanǵan QR Parlamenti Májilisiniń depýtattary da qatysýǵa yqylas tanytyp otyr. Bul týraly Batys Qazaqstan oblystyq týrızm, dene shynyqtyrý jáne sport basqarmasynyń bastyǵy, belgili sportshy-bapker Músilim Ońdaǵanov málim etti.

Onyń aıtýynsha, Elbasymyz Nursultan Nazarbaevtyń jyl saıynǵy Qazaqstan halqyna arnaǵan Joldaýlarynda kásibı jáne buqaralyq sportty damytýǵa, dene shynyqtyrý máselelerine aıryqsha nazar aýdarylady. Aldaǵy jyly Astana men Almaty qalalarynda baıraqty báseke - Qysqy Azııa oıyndary ótpekshi. Kóptegen jańa sport nysandary salynýda. Qos astanadan bastalǵan sporttaǵy serpin respýblıkanyń ózge óńirlerine de juǵysty bolýy tıis. Muny Prezıdent bıylǵy Joldaýynda erekshe atap kórsetti.

"2011 jylǵy Qysqy Azııa oıyndary úshin biz daıyndap jatqan sporttyq ınfraqurylymdar óńirlerdi Astana men Almatydan qalyp qoımaýǵa ıtermeleı otyryp, buqaralyq dene shynyqtyrý-sporttyq qozǵalysyn damytý úshin qajetti alǵysharttar jasaıtyn bolady. 30 paıyzǵa deıingi qazaqstandyqtar buqaralyq sportqa tartylýy kerek", - dedi Elbasy.

Jalpy, Qazaqstanda sportqa degen janashyr kózqaras keshe ǵana bastalǵan joq. Egemendik alǵan tustan beri jylma-jyl Ánuranymyzdy asqaqtatyp, kók baıraǵymyzdy bıikten jelbiretken sportshylardyń jaǵdaıy jaqsaryp keledi. Jeńiske jetse, qomaqty qarjylaı júldesi, basqa da materıaldyq ıgilikteri daıyn. Buǵan, bir jaǵynan, Elbasynyń jeke óziniń sportqa súıispenshiligi de oń yqpal etkeni daýsyz. Ýaqytynyń tyǵyzdyǵyna qaramastan Nursultan Ábishuly úlken tennıs oınaıdy, Shymbulaqta shańǵymen syrǵanaıdy, qazaqtyń ata dástúrimen atqa minedi. Aıaqdoptan Qazaqstan quramasynyń jaýapty oıyndaryn kórermen retinde tamashalaıdy. Bul - úlkenge de, kishige de úlgi-ónege. Memleketke myqty, deni saý ult kerektigin ispen dáleldeýdiń jarqyn kórinisi.

Elbasynyń saıasatyn aımaqtarda tikeleı júzege asyrýǵa birinshi kezekte jaýapty tulǵa ol, árıne, oblys ákimi. Osy oraıda Aq Jaıyq sportynyń aıy ońynan týyp, bıik belesterdi baǵyndyrýyna Baqtyqoja Іzmuhambetovtiń úlken úlesi bar ekendigin aıtqan abzal. Oblys basshysynyń tikeleı qoldaýy arqasynda óńirde sporttyń materıaldyq bazasy bolsyn, qarajat máselesi bolsyn bári ýaqytynda, esh kedergisiz sheshilýde. Aýdandarda sport nysandary kúrdeli jóndelip, kisi qyzyǵatyndaı keıipke enýde. Eki jyl buryn oblys ákiminiń bastamasymen qolǵa alynǵan memlekettik qyzmetkerler arasyndaǵy oblystyq spartakıada osymen bıyl úshinshi ret ótkiziledi. Ol buqaralyq sportty nasıhattaýǵa kómektesetin mazmundy jarysqa aınaldy.

Oblysta halyqtyń túrli toptary sportpen qalaǵan ýaqyttarynda jáne qalaǵandarynsha, eń bastysy, bir tıyn tólemesten tegin shuǵyldana alady. Keıbir oblystarda sporttyq nysandar jekege satylyp ketken. Al Batys Qazaqstanda oǵan jol berilgen joq, barlyq nysandar memleket menshiginde saqtalyp qalyndy.

Kásibı sport deńgeıi kúrt kóterilip keledi. Berisi Qazaqstan, árisi álem, Azııa chempıonattarynda Aq Jaıyqtyń talaı óreni jeńimpaz boldy. Máselen, ótken jyly Erbolat Baıbatyrov sambodan eki dúrkin álem chempıony atansa, jastar arasynda dúnıejúzilik dodada Artýr Úmbetqalıev grek-rım kúresinen top jardy.

«Birer kúnnen keıin Kanadanyń Vankýver qalasynda jalaýy kóteriletin qysqy olımpıada oıyndaryna Batys Qazaqstannan eki birdeı sportshymyz qatyspaq. Olar shańǵyshy Elena Antonova men short-trektiń jas sheberi Aıdar Bekjanov. Aqtóbe, Atyraý, Mańǵystaý sekildi kórshi oblystardan tórt jyldyqtyń tuǵyrly saıysyna birde-bir sportshy joldama ala almady. Demek, bizdiń oblystaǵy sport deńgeıi kórshilerden kósh ilgeri degen sóz. Endigi maqsat - osy baǵytty aldaǵy ýaqytta da jalǵastyra berý», dep túıindedi oıyn M.Ońdaǵanov.