Batysqazaqstandyq sportshylar bıyl 339 medaldi jeńip aldy

Oblystyq dene shynyqtyrý jáne sport basqarmasynyń basshysy Ásııa Amanbaevanyń aıtýynsha, osyndaı dodalarǵa BQO-dan barlyǵy 722 sportshy qatysyp, baq synady.

Óńirde barlyǵy 57 sport túri damysa, sonyń 48-i boıynsha sportshylarǵa halyqaralyq jáne respýblıkalyq týrnırlerge, oqý-jattyǵý jıyndaryna qatysýyna qoldaý kórsetiledi. Osynyń ishinde 26 sport túri olımpıadalyq oıynǵa jatady.

Jyl basynan beri oblystyq, respýblıkalyq jáne halyqaralyq jarystardy ótkizýge basqarma bıýdjetinen 17,970 mln. teńge bólindi. Sonyń nátıjesinde 38 sport túri boıynsha (20-sy olımpıadalyq) 107 jarys ótkizildi.

Oblystaǵy 25 balalar-jasóspirimder sport mektebinde 11038 adam 44 sport túrimen aınalysady. Osy mektepterde 504 oqytýshy-jattyqtyrýshy qyzmet etedi. Bıyl erkin kúres pen short-trekten aǵa bapkerler Asqar Sáýkelın men Maksım Lozovoıǵa «Qazaqstannyń eńbek sińirgen jattyqtyrýshysy» ataǵy berildi. Jattyqtyrýshylardyń biliktiligin arttyrýǵa mán beriledi. Bıylǵy alty aıda 23 bapker (2015 jyly - 35, 2016 jyly - 44) respýblıkalyq semınarlarǵa qatysyp, bilim-biligin kóterdi. Óńirde atalǵan mektepterge qosa olımpıada rezervterin daıarlaý ortalyǵy, oblystyq joǵary sporttyq sheberligi mektebi, sportqa daryndy balalarǵa arnalǵan mamandandyrylǵan oblystyq mektep-ınternaty, 11 sport klýby, sonyń ishinde 3 kásipqoı klýb («Aqjaıyq» sport klýby» JShS, «Aqjaıyq» fýtbol klýby» JShS, «Jaıyq» voleıbol klýby» MKQK) jumys isteıdi.

- Ásııa Raqymqyzy, sońǵy jyldary oblys ortalyǵynda tennıs ortalyǵy, oqýshylar jáne jastar saraıy, Derkól men Zachagan kentinde, sondaı-aq Terekti, Qaratóbe, Syrym aýdandarynda dene shynyqtyrý-saýyqtyrý keshenderi salynǵany málim. Bul baǵyttaǵy jumys jalǵasyp jatqan shyǵar?

- Iá, Batys Qazaqstanda jańadan sport ǵımarattarynyń salynýyna barynsha kóńil bólinip keledi. Qazirgi tańda Zelenov aýdany ortalyǵy Peremetnyı aýylynda 160 oryndyq dene shynyqtyrý-saýyqtyrý kesheni boı kóterýde. Munda kópbeıindi oıyn zaly (voleıbol, basketbol, shaǵyn fýtbol), jekpe-jekter jáne trenajer zaly ornalaspaq. Ǵımaratty bıylǵy qarasha aıynda paıdalanýǵa berý kózdelýde. Sol sekildi Bórli aýdany ortalyǵy Aqsaı qalasynda dene shynyqtyrý-saýyqtyrý kesheni qurylysy aıaqtalyp keledi. Munda oıyn, jekpe-jek, boks, trenajer zaldaryna qosa stadıon, 8 jeńil atletıka jolaǵy, qos birdeı sport alańy bolmaq. Buǵan qosymsha óńirlerdi damytý baǵdarlamasy aıasynda bıyl aýyldyq jerlerde 4 sport alańy salyndy. Jyl aıaǵyna deıni taǵy 28 sport alańyn (munyń 13-i Oral qalasynda, 15-i aýdandarda) iske qosý josparlanýda. Oblystaǵy on eki aýdannyń ekeýinde (Bókeı ordasy men Bórli) ǵana barlyq aýyldyq okrýgter qazirgi zamanǵy sport alańdarymen qamtamasyz etilgen. Óńirde osy zamanǵy «Street workout» sportymen shuǵyldaný úshin 35 alań salynǵan.

Jyl saıyn sporttyq quraldar satyp alýǵa 15 mln. teńge bólinedi. Bıyl bul maqsatqa 13,250 mln. teńge jumsaldy.

Elbasy tapsyrmasyna sáıkes sporttyń buqaralylyǵyn arttyrý máselesi kún tártibinen túsken emes. Turǵyndar arasynda júrgizilgen júıeli jumys nátıjesinde sportpen aınalysýshylar sany ósip keledi. Mysaly, sportpen turaqty shuǵyldanýshylar sany 2015 jyly 158739 adam (óńir turǵyndarynyń 25,3 paıyzy) bolsa, 2016 jyly 170650-ge (26,7 paıyz) jetti. Bıylǵy alty aıda 1432 sporttyq is-sharamen 78897 adam qamtylsa, sonyń 1130-y (40211 adam) aýyldyq jerde ótkizildi. Ulttyq sport túrlerinen ótken 354 sharaǵa 14853 adam qatysty. Prezıdenttik testilerdi tapsyrý boıynsha qysqy sport túrlerinen oblys boıynsha 44049 adam (sonyń 23017-si aýyldyq jerde) baq synap, sonyń ishinde 1001 adam prezıdenttik, 2787-si ulttyq daıyndyq deńgeıi údesinen shyqty. Jazǵy sport túrleri boıynsha 50213 adam (oblys halqynyń 7,9 paıyzy, 29201-i aýyldyq jerden) tartylyp, sonyń 2452-si prezıdenttik, 4734-i ulttyq daıyndyq synaǵyn tapsyra bildi.

Jalpy, oblysta 1545 sport nysany jumys jasaıdy.

Óńirde múmkindigi shekteýli jandar arasynda da sportty serik qylǵandar az emes. Olardyń sany qazirgi tańda 1806-ǵa jetti. Ótken jyly oblys ákimdiginiń qaýlysymen «Múmkindigi shekteýli adamdarǵa arnalǵan sport klýby» MKQK qurylyp, onda 147 adam 11 sport túrimen turaqty aınalysýda. Bıyl múmkindigi shekteýli jandar arasynda 19 aýdandyq, 3 oblystyq, 1 respýblıkalyq jarys ótkizildi.

- Sport salasynda sheshilýi tıisti ózekti máseleler jóninde ne aıtar edińiz?

- Aldymen aıtarym, aýdandyq ákimdikterde derbes dene shynyqtyrý jáne sport bólimderi, aýyldyq okrýgterdiń kópshiliginde nusqaýshy-ádiskerler joq. Oblys boıynsha derbes dene shynyqtyrý jáne sport bólimderi tek Oral qalasy men Bórli aýdandarynda. Qalǵan 11 aýdanda mádenıet, tilderdi damytý, dene shynyqtyrý jáne sport bólimderi jumys jasaıdy. Sondyqtan aýdandyq ákimdikterde derbes «Dene shynyqtyrý jáne sport bólimi» memlekettik mekemesin quryp, ár aýyldyq okrýgte nusqaýshy-ádisker shtatyn engizý qajet.

Aýdandarda dene shynyqtyrý-saýyqtyrý keshenderiniń tapshylyǵy sportty qarqyndy damytýǵa qolbaılaý bolýda. Osy baǵytta Aqjaıyq aýdanynyń ortalyǵy Chapaev aýylynda memlekettik-jekeshelik áriptestik arqyly dene shynyqtyrý-saýyqtyrý keshenin salý josparlanýda. Kúni búgin onyń jobalyq-smetalyq qujattamasy jasalýda. Sonymen qatar Bókeı ordasy, Jańaqala, Jánibek (jobalyq-smetalyq qujattamasy daıyn), Qaztalov, Tasqala jáne Shyńǵyrlaý aýdandarynda osyndaı keshender salý kerek-aq.