Batysqazaqstandyq sportshy toǵyzqumalaqtan eki dúrkin álem chempıony atandy

ASTANA. QazAqparat – Batysqazaqstandyq Áset Qaıyrjanov Aqtóbe qalasynda toǵyzqumalaqtan máresine jetken VI álem birinshiliginde eki dúrkin chempıon atandy, dep habarlaıdy QazAqparat tilshisi.

BQO quramasynyń toǵyzqumalaqtan aǵa bapkeri Jarashan Saǵynbaevtyń aıtýynsha, atalmysh dodaǵa álemniń 20 elinen 80 sportshy qatysty.

Jarystyń sońǵy kúni toǵyzqumalaqtyń rapıd túrinen jeńimpaz-júldegerler anyqtaldy. Áset Qaıyrjanov jeńimpaz atansa, qazaqstandyqtar Asylhan Qojanásip – ekinshi, Nurbek Qabıev úshinshi orynǵa ıe boldy.

Osy chempıonat barysynda Á.Qaıyrjanov blıts túrinen de jeńis tuǵyryna kóterilgen edi. Sóıtip ol eki dúrkin álem chempıony atandy.

Toǵyzqumalaqtan QR memlekettik jattyqtyrýshysy Dáýlet Ábdikárimovtiń málim etkenindeı, álemdik jarys óte joǵary deńgeıde uıymdastyryldy.

Álem birinshiliginde klassıkadan erler arasynda qazaqstandyq Ǵalymjan Temirbaev, áıelderden Ásel Dálıeva top jardy.

Blıtsten áıelder arasynda Gúljanat Aldabergenova jeńimpaz atandy. Rapıdten taǵy bir qazaqstandyq Jámıla Baıldıasheva chempıondyq ataqqa ıe boldy.

«Jalpy, birinshilik qazaqtyń ulttyq oıyny – toǵyzqumalaqtyń álemde keńinen óris alyp kele jatqanyn kórsetti. Altyn medal jóninen óńirler arasynda bıyl Batys Qazaqstan oblysy aldan kórindi. BQO-nyń enshisinde eki altyn», - dedi QazAqparat tilshisine D.Ábdikárimov.

Eske sala keteıik, budan buryn batysqazaqstandyq sportshynyń toǵyzqumalaqtan álem chempıony atanǵanyn jazǵan bolatynbyz.