Batysqazaqstandyq sportshy qol kúresinen álem chempıonatynyń júldegeri atandy
ORAL. QazAqparat - Batysqazaqstandyq Kenjeqyz Qaýpenova Túrkııanyń Antalııa qalasynda qol kúresinen jastar men qyzdar arasynda ótken álem chempıonatynyń júldegeri atandy, dep habarlaıdy QazAqparat tilshisi.
Oblystyq Dene shynyqtyrý jáne sport basqarmasynan túsken málimetke qaraǵanda, Kenjeqyz 65 kg salmaqta kúmis júldeni jeńip aldy.
Batys Qazaqstan oblysynan barǵan taǵy bir sportshy Araılym Qanatova tórtinshi orynǵa taban tiredi. Ekeýin de Murat Ibatov jattyqtyrady.
Budan bir jyl buryn Kenjeqyz Qaýpenova Majarstan astanasy Býdapeshte jastar arasynda ótken álem birinshiliginde jeńimpaz atanǵan bolatyn.
Sonymen qatar Antalııa qalasynda qol kúresinen múmkindigi shekteýli jandar arasyndaǵy dúnıejúzilik dodaǵa BQO-dan úsh sportshy qatysty. Jıenbek Qoshanov 70 kg salmaqta kúmis, Anastasııa Slamıhına 60 kelide qola medalǵa ıe boldy. Ardager sportshy Azon Shaımardanov jubanysh syılyǵyn enshiledi. Bulardyń jattyqtyrýshysy - Amanbek Qoshanov. Oralda múmkindigi shekteýli jandarǵa arnalgan sport klýbynda qol kúresi bólimi ashylǵanyna nebári toǵyz aı bolsa, buǵan deıin batysqazaqstandyqtar el jáne Azııa chempıonattarynda úzdik shyqqan edi.
