Batysqazaqstandyq sportshy aýdaryspaqtan el chempıony atandy
ORAL. QazAqparat - Batysqazaqstandyq sportshy Narmaǵanbet Imanǵazyuly ulttyq sport túrleri boıynsha Almatyda eresekter arasynda ótken el chempıonatynda aýdaryspaqtan jeńimpaz atandy, dep habarlaıdy «QazAqparat» tilshisi.
BQO ulttyq sport mektebiniń dırektory Dastan Myrzaǵalıevtiń aıtýynsha, Narmaǵanbettiń salmaǵynda (60 kg) barlyǵy 14 sportshy baq synady. Solardyń ishinen N.Imanǵazyuly eshkimge des bermeı, úzdik shyqty. Sonymen qatar Meıirbek Qusaıynov 90 kg salmaqta úshinshi orynǵa kóterildi. Olardy Aqtilek Sársenov jattyqtyrady.
«Shákirtterimizdiń jeńis tuǵyrynan kórinýi qýantady. Narmaǵanbet osymen tórt márte el chempıony atanyp otyr. Buǵan deıin jasóspirimder, jastar arasynda birinshi oryn alsa, endi, mine, eresekter sapynda da chempıondyq ataqty jeńip aldy. Sol sekildi Meıirbek te jastar arasynda el birinshiliginiń qola júldesine ıe bolǵan edi», - dedi «QazAqparat» tilshisine Dastan Myrzaǵalıev.
