Batysqazaqstandyq short-trek bapkeri eńbek sińirgen jattyqtyrýshy atandy
ORAL. QazAqparat - QR Mádenıet jáne sport mınıstrligi Sport jáne dene shynyqtyrý isteri komıteti tóraǵasynyń buıryǵymen batysqazaqstandyq short-trek bapkeri Maksım Lozovoıǵa «Qazaqstan Respýblıkasynyń eńbek sińirgen jattyqtyrýshysy» ataǵy berildi, dep habarlaıdy «QazAqparat» tilshisi.
BQO dene shynyqtyrý jáne sport basqarmasynan túsken málimetke qaraǵanda, 2016-2017 jylǵy maýsymda qazaqstandyq shorttrekshilerdiń álem kýbogy kezeńderinde, HHVІІІ qysqy Ýnıversıada men VІІІ qysqy Azııa oıyndarynda tabysty óner kórsetkeni belgili. Sonyń ishinde Maksım Lozovoıdyń da tól shákirtteri bar. Atap aıtqanda, halyqaralyq dárejedegi sport sheberi, 1998 jylǵy Anıta Nagaı kóptegen tabystarǵa qol jetkizdi. Áýeli 2013 jyly Shanhaı qalasynda Azııa kýbogynda úshinshi orynǵa ıe bolsa, sosyn 2016 jyly Grazda (Avstrııa) Eýropa birinshiliginiń kúmis jáne qola júldegeri atandy. Sodan keıin Norvegııanyń Lıllehammer qalasynda jasóspirimder arasynda olımpıada oıyndarynyń, 2017 jyly Almatyda ótken qysqy Ýnıversıadanyń, Sapporodaǵy (Japonııa) qysqy Azııa oıyndarynyń qola júldesin enshiledi. Sol sekildi Qazaqstan ulttyq quramasynyń músheleri, 1997 jylǵy Nurtilek Qajyǵalı men Anıta Nagaıdyń qurdasy Ádil Ǵalıahmetov osyndaı dúnıejúzilik dodalarǵa qatysyp, tájirıbe jınaqtady. Bulardyń úsheýi de bolashaǵynan úlken úmit kúttiredi.
1983 jyly Zelenov aýdany Kóshim aýylynda dúnıege kelgen Maksım Lozovoı - M.Ótemisov atyndaǵy Batys Qazaqstan memlekettik ýnıversıteti dene shynyqtyrý jáne sport fakýltetiniń 2004 jylǵy túlegi. Eńbek jolyn Kóshim orta mektebinde dene shynyqtyrý pániniń muǵalimi bolyp bastady. Al 2007 jyldan beri muz sport saraıy balalar-jasóspirimder mektebinde jáne sportqa daryndy balalarǵa arnalǵan mamandandyrylǵan oblystyq mektep-ınternatynda short-trekten jattyqtyrýshy qyzmetin jemisti atqaryp keledi.
Eske sala keteıik, bıylǵy jyly buǵan deıin osyndaı qurmetti ataqty erkin kúresten álem birinshiliginiń kúmis júldegeri Nurlan Bekjanovty baptaǵan taǵy bir batysqazaqstandyq Asqar Sáýkelın de ıelengen bolatyn. 
