Batysqazaqstandyq shahmatshy álem chempıonatyna joldama aldy
ORAL. QazAqparat - Batysqazaqstandyq shahmatshy Janat Saıyn bıyl kúzde Italııada jastar arasynda ótetin álem birinshiligine joldama aldy, dep habarlaıdy «QazAqparat» HAA tilshisi.
BQO dene shynyqtyrý jáne sport basqarmasynan túsken málimetke qaraǵanda, Janat jýyrda Astana qalasynda 20 jasqa deıingiler arasynda ótken el chempıonatynda klassıkalyq shahmattan jeńimpaz atandy. Barlyǵy 14 komanda quramynda 61 shahmatshy qatysqan dodada taǵy bir batysqazaqstandyq Aısezim Muhıt blıtsten ekinshi oryndy ıelendi. Olardyń ekeýi de - Oral qalasyndaǵy №2 balalar-jasóspirimder sport mektebiniń shákirtteri.
Jattyqtyrýshy Valerıı Mınniń aıtýynsha, endi Janat Saıyn dúnıejúzilik dodaǵa daıyndalatyn bolady.
Aıta keteıik, Janat Saıyn 2015 jyly Taılandtyń Pattaııa qalasynda 17 jasqa deıingi jasóspirimder (oqýshylar) arasyndaǵy shahmattan álem chempıonatynda absolıýtti jeńimpaz atanǵan edi.
