Batysqazaqstandyq samboshylar Mınskide ótken týrnırde tabysty óner kórsetti
ORAL. QazAqparat - Mınsk qalasynda sambo kúresi men áskerı sambodan Belarýs Prezıdentiniń júldesi úshin ótken halyqaralyq týrnırde batysqazaqstandyq samboshylar tabysty óner kórsetti, dep habarlaıdy «QazAqparat» HAA tilshisi.
BQO dene shynyqtyrý jáne sport basqarmasynan túsken málimetke qaraǵanda, Reseı, Ýkraına, Belarýs, Rýmynııa, Grýzııa, Túrkmenstan jáne Qazaqstan elderinen myqty palýandar qatysqan aıtýly dodada sporttyq sambodan Bolatbek Raıymqulov 52 kg salmaqta chempıon atanyp, altynnan alqa taqty. Al Baǵdat Jarylǵasov (62 kg) pen Gaýhar Saǵadat (68 kg) qola júldeni ıelendi. Áskerı sambodan 62 kg salmaqta Qazbek Supyǵalıev kúmis, Shyńǵys Qajıaqbarov qola medaldi jeńip aldy. Palýandardy Qazbek Ibrashev pen Qazaqstannyń eńbek sińirgen jattyqtyrýshysy Raıbek Meńdiǵalıev baptaıdy.
Aıta keteıik, osy jarysta sondaı-aq Qazaqstannan barǵan Baǵlan Ibragım (52 kg), Eset Qýanov (62 kg), Erasyl Qajybaev (+100 kg), Dınara Jumabaeva (64 kg), Gúlnur Erbolova (52 kg), Maqat Nuralıev sambodan qola júldeni enshiledi. Al áskerı sambodan Rýslan Aýshev (+100 kg) chempıon atandy.
