Batysqazaqstandyq samboshy álem chempıonatynyń kúmis júldegeri atandy
ORAL. QazAqparat - Batysqazaqstandyq samboshy Armat Qabdolov jastar arasynda Tbılısıde ótip jatqan álem chempıonatynyń kúmis júldegeri atandy, dep habarlaıdy QazAqparat tilshisi.
BQO dene shynyqtyrý jáne sport basqarmasynyń habarlaýynsha, 52 kg salmaqta ıýnıorlar arasynda kúresken Armat qatarynan tórt kezdesýinde qarsylastaryn tize búktirdi.
A.Qabdolov fınalda ǵana reseılik Harýn Tlıshevke ese jiberdi. Armattyń bapkeri - Meıirim Bazarov.
Aıta keteıik, aıtýly dodada qazaqstandyq basqa palýandar da júldesiz qalyp jatqan joq.
Halyqaralyq sambo federatsııasynyń saıtynan alynǵan málimetke qaraǵanda, eki kúnniń qorytyndysy boıynsha ıýnıorlar arasynda Asqar Esposynov 48 kg salmaqta jeńimpaz atansa, Bekzat Moldaqapas (62 kg) pen Toqtarbek Aıdarbek (82 kg) qola júldege qol jetkizdi. Jastardan Jandaraly Shyńǵys (60 kg) pen Kemelbek Moldash (65 kg), Bıbarys Ábdýǵanı (ıýnıor, +100 kg) kúmis, Dıana Ǵaıbolla (52 kg), Gúlnáz Nurdınova (56 kg), Araılym Ábenova (+75 kg) qola júldeger atansa, ıýnıorlardan Arnur Qýataı (68 kg), Ádııa Saıyn (44 kg) men Gúlzada Almaz (56 kg) úshinshi orynǵa kóterildi.
