Batysqazaqstandyq samboshy álem chempıonatynyń qola júldegeri atandy
ORAL. QazAqparat - Reseıdiń Sochı qalasynda erler men áıelder arasynda sambodan ótip jatqan álem chempıonatynda batysqazaqstandyq Temirlan Ihsanǵalıev qola júldeger atandy, dep habarlaıdy «QazAqparat» tilshisi.
Áskerı sambodan 82 kg salmaqta kúresken Temirlan birinshi aınalymda reseılik Alekseı Ivanovtan 7:3 esebimen basym tústi. Sodan keıin chehııalyq palýandy utqanymen, shırek fınalda belarýs Evgenıı Aleksıevıchke asa tartysty básekede 2:3 esebimen jol berdi. Bul beldesýde tóreshiler qarsylasyna eskertý bergende, Temirlan utatyn edi. Budan keıin E.Aleksıevıch fınalǵa ótkendikten, qazaqstandyq palýan qola júlde úshin kúresýge múmkindik aldy. Sońǵy eki qarsylasyn da merziminen buryn tize búktirgen T.Ihsanǵalıev osylaısha úshinshi orynǵa ıe boldy.
Al E.Aleksıevıch fınalda ońtústikkoreıalyq Seo heon KO-dan utylyp qaldy. Sóıtip ońtústikkoreıalyq sportshy óz eliniń tarıhynda tuńǵysh ret sambodan álem chempıony atandy. Osy birinshilikte qyrǵyz, tájik palýandarynyń da álem chempıony atanǵandyǵyn eskersek, bul sambo sportynyń dúnıejúzinde keń taralyp kele jatqandyǵyn kórsetedi.
Aıta keteıik, batysqazaqstandyq Temirlan Ihsanǵalıev áskerı sambodan osymen tórtinshi márte álem chempıonatynyń júldegeri atanyp otyr. 74 kg salmaqta 2009 jyly Grekııanyń Salonıkı qalasynda ótken dúnıejúzilik dodada qolaǵa qol jetkizse, 2015 jyly Marokkonyń Kasablanka shaharynda ekinshi orynǵa kóterildi. Al ótken jyly Bolgarııa astanasy Sofııada 82 kg salmaqta taǵy bir qola medaldi jeńip alǵan bolatyn. Oǵan qosa Temirlan - qoıan-qoltyq urys pen aralas jekpe-jekten de talaı dodadan oljaly oralyp júrgen sportshy.
