Batysqazaqstandyq saqshylar izdestirgen 20 qylmysker Reseıde ustaldy
ORAL. QazAqparat - Sońǵy úsh jylda BQO ishki ister departamenti izdestirgen 20 qylmyskerdiń birlesken is-qımyl nátıjesinde Reseı aýmaǵynda júrgeni anyqtalyp, ustaldy. Bul týraly Oraldaǵy Dostyq úıinde Reseıdiń kórshiles bes óńiri men Atyraý oblysy ishki ister qurylymdary basshylarynyń qatysýymen ótken keńeste BQO ishki ister departamentiniń bastyǵy, polıtsııa general-maıory Maqsuthan Ablazımov málim etti, dep habarlaıdy «QazAqparat» tilshisi.
Esirtki bıznesine qarsy kúres, halyqaralyq terrorızm men dinı ekstremızm jáne zańsyz kóshi-qon máseleleri talqylanǵan jıynda M.Ablazımovtyń aıtýynsha, sol sekildi atalǵan merzimde reseılik quqyq qorǵaý organdary izdeý salǵan 37 qylmysker BQO aýmaǵynda quryqtaldy. Mundaı baǵyttaǵy jumystarǵa Qazaqstan jáne Reseı Federatsııasy ishki ister mınıstrlikteri birlesken alqasy aıasynda bekitilgen vedomstvoaralyq kelisimniń tyń serpin bereri anyq. Bul, ásirese, Reseıdiń bes birdeı óńirimen shektesetin Batys Qazaqstan oblysy úshin erekshe mańyzdy.
Departament bastyǵy óńir basshylyǵynyń qoldaýy nátıjesinde qylmys sanynyń, sonyń ishinde asa aýyr qylmystardyń 30,3, aýyr qylmystardyń 16,2 paıyzǵa azaıǵanyn jetkizdi.
Keńeske qatysqan oblys ákiminiń orynbasary Baǵdat Azbaev eki el arasynda barlyq salada, sonyń ishinde qylmys ataýlymen kúreste ózara tıimdi qarym-qatynastyń mańyzy zor ekendigin atap ótti.
Jıyn barysynda shekaralyq yntymaqtastyq pen birlesken is-qımyldy nyǵaıtý týraly RF ishki ister mınıstrliginiń bes oblystaǵy bas basqarmasynyń basshylary óz oı-tolǵamdaryn bildirip, ásirese, halyqaralyq terrorızm men dinı ekstremızm, esirtki tasymaly men bıznesine, zańsyz kóshi-qon men adam saýdasyna qarsy kúreske erekshe nazar aýdardy. Mysaly, RF ІІM Orynbor oblysy boıynsha bas basqarmasynyń basshysy Mıhaıl Davydov qylmyspen kúres shekaralas aımaqtar úshin aıryqsha mańyzǵa ıe bolyp otyrǵanyn, sondyqtan birlesip jumys jasaýmen birge jańasha is-tásilderge kóshý qajettigin jetkizdi. Zańsyz kóshi-qon, esirtki men qarý tasymaly sekildi qaýipti qubylystarǵa tosqaýyl qoımaıynsha, memlekettiń tynyshtyǵyn qamtamasyz etý múmkin emes. Bul rette halyqaralyq qylmystyq toptardyń jolyn kesý úshin úılesimdi jedel izdestirý sharalaryn júrgizýdiń máni zor. Halyqaralyq terrorızm men dinı ekstremızm qaýpi tónip turǵan mezgilde eki eldiń arnaıy qyzmetteri baqylaýǵa alǵan adamdardyń baılanysyn da der kezinde anyqtaı bilý kerek.
QR ІІM Saratov, Astrahan, Volgograd jáne Samara oblystary boıynsha bas basqarmalarynyń basshylary da usynys-pikirlerin bildirdi.
Keńes sońynda QR jáne RF ishki ister qurylymdarynyń shekaralas yntymaqtastyǵy boıynsha birlesken hattamaǵa qol qoıyldy.
