Batysqazaqstandyq polıtseıler 2 myńnan astam kıik múıizin tárkiledi

ORAL. QazAqparat – Batysqazaqstandyq polıtseıler 2 myńnan astam kıik múıizin tárkiledi, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, uıymdasqan qylmysqa qarsy kúres basqarmasy QR UQK BQO boıynsha departamentiniń qyzmetkerlerimen birlesip, «Brakoner» jedel aldyn alý is-sharasy barysynda kıik derıvattarynyń zańsyz aınalymymen aınalysqan qylmystyq topty ustady.

«Tintý barysynda 2 myńnan astam kıik múıizi tabylyp, tárkilendi. 5 kúdikti Oral qalasy polıtsııa basqarmasyna jetkizildi. Olardyń ústinen QR QK 339-1-babyna (sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan ósimdikter nemese janýarlar túrlerimen, olardyń bólikterimen nemese derıvattarymen zańsyz aınalysý) sáıkes qylmystyq is qozǵalyp, sotqa deıingi tergeý amaldary júrgizilýde», dep habarlady vedomstvodan.